DILI, 09 outubru 2024 (TATOLI)—Komisaun C trata asuntu Finansa Públika iha Parlamentu Nasionál (PN) sei hala’o semináriu hodi diskute Panorama Orsamentál iha munisípiu Liquiça iha semana oin.
Notísia Relevante: Meza PN baixa proposta-lei OJE 2025 ba komisaun C
“Tuir kalendáriu ne’ebé komisaun C aprova, iha 16 to’o 17 outubru 2024 semana oin, sei diskute Panorama Orsamentál,” Prezidente Komisaun C, Cedelizia Farria dos Santos, informa iha Parlamentu Nasionál.
Komisaun C sei konvida liña ministériu, Banku Sentrál Timor-Leste (BCTL), ho entidade sira seluk inklui sosiedade sívil, ne’ebé tuir planu sei halo diskusaun ne’e iha Liquiça.
Objetivu semináriu ne’e atu rona opiniaun no hanoin kona-ba proposta-lei Orsamentu Jerál Estadu (OJE) 2025 husi Deputadu sira, Governu no parseiru sira, hafoin lori ba PN debate no aprova.
Enkuantu, tuir kalendáriu ne’ebé komisaun iha loron 21-25 outubru 2024 ne’e sei halo audiénsia públika ba proposta-lei OJE 2025 ho liña ministériu no entidade Estadu sira.
Bainhira audiénsia ramata, komisaun sei hala’o nia relatóriu no paréser hodi envia ba meza Parlamentu Nasionál (PN).
Tuir kalendáriu, iha loron 06 fulan-novembru tinan 2024 ne’e sei hahú halo diskusaun iha plenária faze jeneralidade durante loron tolu, hafoin ramata kontinua kedas ba espesialidade no finál globál.
Tuir kalendáriu, iha 27 novembru 2024, sei envia proposta-lei OJE 2025 ba Prezidente Repúblika (PR), José Ramos Horta, no Xefe Estadu mak iha kompeténsia eskluziva atu promulga.
Enkuantu, iha reuniaun plenária 07 outubru 2024, meza PN anúnsiu admisaun no baixa ba Komisaun Finansa Públika ho Komisaun espesializada permanente sira seluk ba proposta-lei númeru 12/VI (2a) Orsamentu Jerál Estadu (OJE) 2025.
Iha loron 01 outubru 2024, Governu liuhusi Ministra Finansa, Santina Cardoso, submete ona proposta-lei OJE 2025 ho montante billaun $2,6 ba Parlamentu Nasionál (PN).
Notísia Relevante: Governu submete proposta-lei OJE 2025 biliaun $2,6 ba PN
Jornalista : Nelson de Sousa
Editór : Cancio Ximenes
