DILI, 09 outubru 2024 (TATOLI)—Ministériu Edukasaun (ME) planeia iha fulan-novembru ne’e atu koloka tan profesór ne’ebé rekrutadu husi vaga bolsa kandidatu faze daruak, ba eskola sira iha territóriu tomak ne’ebé presiza profesór.
“Profesór kandidatu faze daruak ne’ebé planu atu koloka iha inisíu novembru hamutuk 497. Ida-ne’e ita públika sai tiha ona no ami hein fali iha sesta semana ne’e hodi simu fali sira-nia dokumentu. Bainhira sira kompleta tiha ita sei halo xamada tan ba sira, depois fó pose tiha mak foin koloka sira ba eskola sira iha munisípiu ne’ebé presiza profesór,” Diretora Nasionál Rekursu Umanu iha ME, Anita Tavares, hateten, iha nia knaar fatin, Vila-Verde, kuarta ne’e.
Notísia relevante : Profesór 684 rekrutadu husi bolsa kandidatu faze daruak simu pose
Nia dehan, kolokasaun ida-ne’e bazeia mós ba orsamentu, tanba ne’e ME iha planu koloka fazeadamente. Sei koloka profesór sira ne’ebé hetan valór 66 to’o 68.
Dirijente ne’e akresenta katak submisaun dokumentu komprovativu bolsa kandidatu faze daruak husi númeru seriasaun 686 to’o 1182, ba grupu rekrutamentu siklu 1 no 2 Ensinu Báziku.
Bazeia ba despaixu homologasaun Ministra Edukasaun ho númeru 044/GMME/VIII/2024, loron 23 agostu 2024 ne’ebé aprova seriasaun bolsa kandidatu ba grupu rekrutamentu siklu 1 no 2 Ensinu Báziku ho kandidatu hamutuk 2.441.
Nune’e, Diresaun Nasionál Rekursu Umanu apela ba kandidatu sira husi númeru seriasaun 685 to’o 1182 husi pontuasaun 66 até 68 atu komprova no kompleta dokumentu rekezitu sira molok hakat ba étapa sira tuirmai.
Dokumentu sira ne’ebé anexa mak hanesan identidade Bilhete de Identidade (BI), kartaun Eleitorál, sertidaun RDTL, rejistu kriminál ne’ebé válidu, atestadu médiku (husi Hospital Nacional Guido Valadares) inklui diploma nível edukasaun mínimu liu mak baxarelatu legalizadu husi Ministériu Ensinu Superiór, Siénsia no Kultura (MESSK) inklui konta bankária no númeru IBAN.
Submisaun dokumentu sira ne’e ho versaun fíziku (hard copy) no koloridu.
Jornalista : Osória Marques
Editora : Julia Chatarina
