COVALIMA, 09 Outubru 2024 (TATOLI) – Veteranu no mártir nia oan na’in-94 iha Covalima asesu ba bolsa estudu 2024 husi Ministériu Asuntu ba Kombatente Libertasaun Nasionál (MAKLN) bazeia ba rejime atribuisaun bolsa estudu ba kombatente no mártir libertasaun nasionál iha dekretu- lei númeru 8/2009, 15 Janeiru.
Sekretáriu Konsellu Munisipál Kombatente Libertasaun NasionáL Covalima, Joaquim Barros “Sikat leet”, dehan konsellu munisipál simu ona lista rezultadu finál husi ministériu kona-ba bolsa estudu husi primeiru to’o terseiru siklu ensinu báziku, ensinu sekundáriu no ensinu superiór iha rai-laran no li’ur.
“Lista finál husi Ministériu Asuntu ba Kombatente Libertasaun Nasionál ne’e estudante primeiru siklu na’in-tolu, segundu no terseiru siklu ensinu báziku na’in-15, ensinu sekundáriu 25, ensinu superiór rai-laran 50 no ensinu superiór rai-li’ur na’in-ida”, Joaquim Barros adianta iha Tabakolot, ohin.
Ministériu Asuntu ba Kombatente Libertasaun Nasionál, liuhusi Konsellu Veteranu Covalima loke inskrisaun iha Marsu no remata iha Abríl 2024, ne’ebé nia rezultadu hatudu katak estudante na’in-94 mak liu no 119 la liu.
Bolsa estudu ne’e fó oportunidade ba mártir no veteranu nia-oan ne’ebé kada munisípiu iha kandidatura na’in-100. Orsamentu ne’ebé aloka ba veteranu no mártir nia oan asesu ba bolsa ba estudante na’in-94 hamutuk $178.150.
Valór orsamentu ba estudante sira ne’e diferensa. Ba estudante ensinu superiór rai-laran kada tinan estudante hetan rihun ida, bá rai-li’ur rihun rua, ba ensinu sekundáriu, kada estudante hetan $650, segundu no terseiru siklu sei hetan $600 no primeiru siklu sei hetan $300.
Estudante ne’ebé liu bolsa estudu husi Ministériu Asuntu ba Kombatente Libertasaun Nasionál no daudaun hala’o hela sira-nia estudu ne’e nia osan sei tama iha konta bankária iha Novembru.
“Maibé ba estudante primeiru siklu to’o terseiru siklu nia idade seidauk to’o atu hasai Kartaun Eleitorál, nia osan transfere ba nia inan-aman nia konta bankária. Ba estudante ensinu sekundáriu no ensinu superiór transfere direta ba sira-nia konta bankária”, esplika.
Notísia relevante: Veteranu no mártir nia oan 210 inskreve asesu ba bolsa estudu – CMCLN Covalima
Jornalista: Celestina Teles
Editora: Maria Auxiliadora
