DILI, 10 outubru 2024 (TATOLI) – Primeiru-Ministru (PM), Kay Rala Xanana Gusmão, elojia no agradese bá Assembleia Inter-Parlamentár ASEAN nian (AIPA), ne’ebé durante ne’e fó apoiu tomak ba prossesu adezaun Timor-Leste nian.
Primeiru-Ministru hato’o apresiasaun ne’e liuhusi deklarasaun jerál iha okaziaun enkontru ho Líder sira ASEAN nian ho Reprezentante Assembleia Inter-Parlamentár ASEAN (AIPA), iha Viensiana, Repúblika Demokrátika Populár (RDP) Laos, ohin.
“Ami elojia no louva Assembleia ne’ebé servisu hodi fó apoiu no armoniza inklui haforsa kuadru sira lejizlativu atu aliña ho norma sira no prátika ASEAN nian,” Xanana Gusmão hateten liuhusi nota ne’ebé TATOLI asesu husi media Gabinete PM.
Iha oportunidade ne’e, Xanana deklara katak, Timor-Leste sai ona observadór iha Assembleia Inter-Parlamentár ASEAN nian desde tinan 2018 iha Singapura.
Alende ne’e, nia dehan, TL sai ona testemuña ba Assembleia hodi enkoraza diálogu, servisu hamutuk ho kompriensaun entre Parlamentu hosi nasaun membru ASEAN.
“Ita haree ona oinsá rekomendasaun hosi Assembleia ne’ebé ajuda Parlementu Nasionál hodi tradús prioridade sira rejionál nian iha Lei sira no polítika nasionál. Parlamentu Nasionál Timor-Leste apoia akordu rejionál,” nia hateten tán.
Oportunidade ne’e, Primeiru-Ministru aprezenta katak, TL estabelese ona Komité ad-hoc ne’ebé enkarregadu hodi ratifika akordu Protokolu ASEAN nian, promulga Lezislasaun relevante sira, monitoriza implementasaun akordu sira ne’e, no reprezenta interese povu timorense iha forum rejionál sira.
Ho partisipasaun ativamente iha atividade sira AIPA nian, Timor-Leste hetan koñesimentu no apreende prátika di’ak sira ne’ebé haforsa liután prossesu sira lezislativu no estrutura governasaun nian.
Atu taka, Xanana Gusmão hakarak re-afirma fila-fali kompromissu Timor-Leste nian atu kompleta prossesu sira interna ba akordu prioritáriu sira iha pilár tolu Komunidade ASEAN nian iha tinan oin.
Xanana Gusmão espera kolaborasaun kontínua ho membru sira Parlamentu ASEAN nian no parseiru dezenvolvimentu sira iha medida esforsu servisu hamutuk ba adezaun TL atu sai membru plenu ASEAN.
Partisipa iha Assembleia ne’e maka líder sira ASEAN nian, Prezidente Assembleia Inter-Parlamentár ASEAN, deputadu sira Parlamentu no Sekretáriu-Jerál AIPA, delegadu sira no Parlamentu Timor-Leste partisipa husi deputada Lídia Norberta no deputadu Augusto Domingos ‘Deker’ hosi Komisaun B Trata Assuntu Negósiu Estranjeiru, Defeza no Seguransa.
Jornalista: Hortencio Sanchez
Editór: Florencio Miranda Ximenes
