AMD troka ona lixeiru ne’ebé ema deskoñesidu sunu iha suku Comoro

DILI, 10 outubru 2024 (TATOLI)—Autoridade Munisipál Dili (AMD) troka ona lixeiru haat foun ne’ebé ema deskoñesidu sunu iha suku Comoro, nune’e komunidade bele soe fali lixu iha laran.

Xefe Departamentu Servisu Água no Saneamentu iha AMD, Domingos dos Santos Soariano, esplika, ekipa aumenta lixeiru iha fatin ne’ebá tanba komunidade soe lixu barak, nune’e lixeiru labele akumula to’o nakonu iha rai.

“Empreza China Harbour mak tau fali lixeiru ne’ebé ema sunu ne’e iha suku Comoro, tanba distribuisaun lixeiru sira ne’e mai husi empreza ne’e rasik. Ita ko’alia kona-ba masa ne’ebé akontese ahi-han iha suku Comoro nian iha klínika oin ne’e ami troka ona, ami langsung husi fatin ne’ebá, mai fali kraik,” Xefe Departamentu Servisu Água no Saneamentu, informa iha Agência Tatoli, iha ninia knaar fatin, Matadouru, kinta ne’e.

Notísia relevante : Traballadór HEC PAX husu komunidade soe lixu iha lixeiru

Ekipa responsável serbisu muda lixeiru iha fatin ne’ebé ahi-han ne’e ba fatin seluk tanba klínika Comoro hato’o ona karta ba AMD atu muda lixeiru sira.

“Sira husu favór ida, AMD muda fatin lixu dook oituan, ne’ebé ami muda tiha ona. Maibé problema mak ema tau foer nafatin iha fatin ne’ebá, tanba fatin luan para ema soe foer,” nia akresenta.

Xefe Departamentu fó hatene ona ba Xefe suku Comoro atu tau-matan hela ba lixeiru sira no sensibiliza populasaun hodi labele soe lixu arbiru iha fatin ne’ebé muda sai ona.

“Husu nafatin ba komunidade atu labele so’e foer arbiru, buka kontribui ba Dili moos atu ema hotu bele garantidu ba saúde públika iha kapitál. Ami mós fó hatene ona Xefe suku. Tanba ne’e iha loron ne’e di’ak, maibé kalan ne’e mak ita labele kontrola,” nia tenik.

Jornalista     : Jesuína Xavier

Editora          : Julia Chatarina