DILI, 19 septembru 2024 (TATOLI)–Traballadór empreza HEC PAX, Okran Kapitan, husu ba komunidade iha Palapasu no Kampung Alor atu soe lixu iha lixeiru ne’ebé Governu prepara ona atu bele fasilita traballadór HEC PAX bele hala’o servisu hodi rekolla lixu ho lalais.
Notísia Relevante: Durante vizita Papa la rekolla lixu, ekipa saneamentu raut la hotu
Okran Kapitaun sente prekupa, tanba utiliza ona ekipamentu modernu uitoan maibé komunidade seidauk iha konsiénsia hodi kontinua soe lixu arbiru, tanba ne’e mak sente ladún furak.
“Favor ida komunidade so’e foer karik, so’e halo didiak ba no ba lixu fatin atu nune’e mai karik ita labele haree foer sira naklekar arbiru hanesan ne’e. Tuir lolos ne’e, ami ekipa mai foti loos lixu fatin kaixote ne’ebé prepara ona tanba foer haloot hotu ona iha laran. Maibé, realidade lae, komunidade sempre so’e foer arbiru de’it no ami sempre raut fila-fali no ita sente ladún di’ak,” Trabailladór HEC PAX, Okran Kapitaun, hateten ba Agência Tatoli, bainhira rekolla hela lixu sira estrada ninin Kampung Alor, kinta ne’e.
Nia esplika, difikultadade ne’ebé hasoru iha terrenu mak komunidade soe lixu arbiru tanba dalaruma haree ne’e lixu fatin ka kaixote ne’e husik mamuk hela, maibé sira soe lixu ne’e husik naklekar no namkari de’it iha rai ne’ebé kaixote lixu hatuur ba ne’e.
“Ha’u nafatin husu ba komunidade, karik haree mak lixu fatin nakonu bele tau iha saku oan ruma, nune’e bele fasilta ami rekoola lixu no transporta ba karreta laran, labele soe hanesan fakar iha li’ur hanesan ne’e,” nia dehan.
Taballadór Hec Pax ne’e hahú hala’o serbisu iha 26 agostu 2024, molok amu Papa Francisco atu mai hala’o vizita pastorál no Estadu iha Timor-Leste. Área ne’ebé nia kobre atu rekolla lixu mak hanesan lixu fatin iha área Palapasu no Aitarak Laran.
Ekipa HEC PAX hahú hala’o serbisu husi dadeer tuku 06h00 dadeersan to’o meudia tuku 12h00 hodi deskansa no hahú fali serbisu iha tuku 13h00 to’o tuku 16h00 lorokraik.
“Dalaruma lixu barak liu, ami la deskansa no kontinua raut nafatin. Tanba, se lae, aban mai fali lixu nakonu fila-fali,” nia hateten.
Tuir observasaun Tatoli, iha fatin barak iha kapitál ne’e, komunidade soe lixu la tau iha lixu fatin, maske haree nakonu ona lixu, komunidade ba fakar lixu naklekar iha estrada no anin huu lori plastiku sira ba fatin-fatin.
Jornalista : Jesuína Xavier
Editór : Cancio Ximenes
