Asaun Sosiál gasta $11.135 sosa kaixaun hodi tulun família matebian
COVALIMA, 10 Outubru 2024 (TATOLI) – Servisu Munisipál ba Asaun Sosiál (SMAS) halo akizisaun, entre Jullu no Setembru, kaixaun hamutuk 108 ho osan montante $11.135 hodi apoia ba família matebian vulneravel.
“Ami fó kaixaun ba família matebian vulneravel husi postu hitu bazeia ba pedidu atu apoiu kaixaun. Nune’e, durante trimestre datoluk simu ona pedidu apoia kaixaun hamutuk 108”, Diretór SMAS, Clementino Bere, dehan iha Bairru Costa, ohin.
SMAS fó apoiu kaixaun ba komunidade sira bazeia ba Dekretu-lei númeru 21/2008 no transporte hodi tula mate-isin sira husi kapitál Covalima bá postu sira.
Apoiu ne’ebé fó iha trimestre datoluk ne’e maioria ba família matebian husi postu administrativu Zumalai, Suai, Fohorem, Maucatar no Fatumea, enkuantu Fatululik no Tilomar la submete pedidu.
Kritériu atu fó apoiu kaixaun mak presiza lori deklaraun husi xefe suku, fotokópia kartaun eleitorál husi matebian no reprezentante família matebian nia kartaun eleitorál.
“SMAS fó apoiu kaixaun ho medida boot hamutuk 42, orsamentu hamutuk $7.140, tanba kada kaixaun ho nia folin $170, kaixaun natoon ida ho folin $95 no kaixaun ki’ik hamutuk 65, osan hamutuk $3.900, tanba kada kaixaun ho nia folin $60”, nia realsa.
Orsamentu Jerál Estadu ba 2024 ne’ebé aloka ba Covalima hamutuk millaun $7,3 husi montante ne’e prevee ba Programa Inkluzaun Sosiál hamutuk $153.497 no husi númeru ne’e gasta osan ba sosa kaixaun hamutuk 11.135.
Jornalista: Celestina Teles
Editora: Maria Auxiliadora
