DILI, 10 outubru 2024 (TATOLI) – Governu liuhusi reuniaun Konsellu Ministru (KM) extraordináriu , kinta ne’e, avalia relatóriu preliminár kona-ba despeza atividade sira ne’ebé relasiona ho vizita Sua Santidade Papa Francisco nian, ne’ebé aprezenta husi Ministru Administrasaun Estatál, Tomás do Rosário Cabral.
Molok ne’e, Governu liuhusi reuniaun Konsellu Ministru (KM),delibera atu autoriza despeza to’o montante millaun $12 hodi gasta ba vizita Santo Papa Francisco.
Notisia relevante:Governu autoriza despeza to’o millaun $12 ba preparasaun vizita Papa Francisco
“Tuir relatoriu ne’ebé iha, husi montante millaun $12 ne’e, konsege ezekuta ona $9.978.658,12 ne’ebé rezulta iha saldu pozitivu hamutuk $2.021.341,12, ne’ebé sei hatama fali ba kofre Estadu,” refere nota ne’ebé TATOLI asesu, ohin.
Montante ne’e Governu foti husi Fundu Kontinjénsia ba Komisaun Altu Nível Institusionál ba vizita Sua Santidade Papa Francisco, hodi organiza atividade preparasaun ba vizita referidu durante loron tolu husi 9 to’o 11 setembru.
Konferénsia Episkopál Timorense (CET), liuhosi ekipa Komisaun Koordenadora Igreja nian, sei hala’o enkontru avaliasaun interna iha loron 23 novembru tinan 2024 no Komisaun Konjunta, ne’ebé kompostu husi Governu, ekipa Igreja nian no reprezentante Santa Sé nian iha Timór -Leste, sei konklui atividade sira iha loron 21 fulan-Dezembru tinan 2024, loron ne’ebé maka reprezentante hosi Santa Sé no hosi Igreja lokál sei transmiti mensajen ofisiál ida hosi Vatikanu.
Entretantu, Governu nomea ona Ministru Prezidénsia Konsellu Ministru, Agio Pereira, nu’udar Koordenadór Jerál ba vizita Santo Papa, enkuantu Ministru Administrasaun Estatál, Tomás do Rosário Cabral nu’udar Vise Koordenadór.
Notisia relevante: PN seidauk simu relatóriu ezekusaun millaun $12 ba preparasaun vizita Papa Francisco
Jornalista: Hortencio Sanchez
Editor: Florencio Miranda Ximenes
