DILI, 10 outubru 2024 (TATOLI)—Institute of Business (IOB) utiliza subvensaun públika husi Governu liuhusi Ministériu Ensinu Superiór Siénsia no Kultura (MESSK) ba atividade prinsipál haat.
“MESSK atribui subvensaun $326.000 ba IOB ba tinan ne’e, nune’e ita uza ba atividade prinsipál haat, dahuluk ita uza ba kompra rekursu aprendizajen ne’e ita hola komputadór, projetór, meza no kadeira inklui ekipamentu ba laboratóriu sira, iha mós alokasaun ba konstrusaun dormitóriu, ne’e ita halo iha Maliana, iha mós alokasaun ba programa língua portugés nia, iha mós alokasaun ba formasaun ba dosente no estudante, iha mós atribuisaun ba mellór estudante no dosente,” Reitór IOB, Pedro Barreto Ximenes, hateten, iha ninia knaar fatin, Fomento, kinta ne’e.
Nia dehan, institutu ne’e ezekuta ona subvensaun 60% no espera bele ezekuta hotu iha dezembru tinan ne’e nia laran.
“Tuir planu MESSK nia katak iha fulan-janeiru nia laran ne’e orsamentu hirak ne’e tenke ezekuta hotu ona,” nia akresenta.
Notísia relevante : USAID-IOB lansa sentru dezenvolvimentu foinsa’e iha Maliana
IOB hakarak halo dormitóriu ba estudante sira iha Maliana tanba atu fasilita estudante sira ne’ebé hela dook.
“Dormitóriu Maliana ne’e ba estudante sira ne’ebé eskola iha ne’ebá, tanba estudante sira eskola iha ne’ebá ne’e husi foho mak mai, entaun iha Maliana ne’e atu hetan kost mós susar, entaun ida-ne’e mak ita halo kedas dormitóriu nune’e sira bele toba kedas iha eskola ne’ebá,” Reitór IOB hato’o.
Iha sorin seluk, Ministru Ensinu Superior Siénsia no Kultura, José Honório da Costa Pereira Jerónimo, hateten, Governu apoiu subvensaun públika ba ensinu superiór sira ne’e hodi fasilita sira-nia atividade iha universidade nune’e bele eleva kualidade edukasaun iha Timor-Leste.
“Ita fó apoiu signifika sira mós tenke fó buat ruma ba ita, sira fó buat ruma mak kualidade. Tanba ne’e mak ita apoiu subvensaun ba sira,” Ministru katak.
Governante ne’e fó hanoin, osan ne’e povu nian nune’e husu ba kada ensinu superiór sira ne’ebé hetan apoiu tenke iha responsabilidade atu ezekuta ho didi’ak.
“Tanba faze dahuluk ne’e ita transfere uluk 40%, depois iha ekipa téknika ne’ebé sei ba tuir atu haree sira-nia prosesu ba ezekusaun ba subvensaun, depois ita haree sira-nia progresu hafoin ita transfere tan 60% ba sira,” nia hato’o.
Jornalista : Osória Marques
Editora : Julia Chatarina
