DILI, 10 outubru 2024 (TATOLI)–Papa Francisco hakerek karta agradesimentu ba Koordenadór ekipa altu nível ba vizita Papa Francisco no Ministru Administrasaun Estatál, Tomás do Rosário Cabral, ba esforsu no preprasaun simu vizita Apostólika nian durante loron-tolu iha Timor-Leste, hahú loron 09 to’o 11 setembru 2024.
“Ha’u hakarak hato’o ba ita, ha’u-nia gratidaun ba empeñu no dedikasaun hotu iha preparasaun no akompaña eventu hotu, ne’ebé Koordenadór jerál ekipa Governativa organizadora ba ha’u-nia viajen Apóstolika foin lalais ne’e iha Timor-Leste. Ba atensaun ne’ebé dedika no apoiu oferesidu durante ha’u-nia estadia sai fundamentál ba susesu vizita pastorál,” Amu Papa Francisco hakerek iha karta ne’ebé haruka ba Koordenadór, hanesan Agência Tatoli asesu iha nota husi Ministériu Administrasaun Estatál (MAE), kinta ne’e.
Notísia relevante : Governu konsege gasta millaun $9-resin ba preparasaun hotu hodi simu Papa Francisco
Papa reforsa: “Ha’u hakarak resaltar ka enfatiza buat ne’ebé ha’u apresia nu’udar auxiliu ka ajuda ne’ebé loloos ka sertamente kontribui atu fortalese liután lasu koperasaun no amizade entre Timor-Leste ho Santa Sé,”
Amu Papa ne’e hakerek tan katak labarik no foinsa’e sira nu’udar futuru nasaun nian “Povu timorense nu’udar sein dúvida povu ida boot, povu ida ho esperansa ba futuru ne’ebé haree liuhusi labarik no joven sira. Ha’u sei la haluha momentu sira ne’ebé iha ne’ebá no rai ho kariñu iha memória barak no rekordasaun furak.”
Papa Francisco hato’o tan nia gratidaun ba serbisu no esforsu ba koordenadasaun husi ekipa Timor-Leste nian, ho forsa seguransa no komitiva responsável Vatikanu nian. “Bem haja, ministru”.
Ikus liu, Papa husu “Halo favor, labele haluha reza ba ha’u, ha’u mos reza ba o.”
Jornalista : Jesuína Xavier
Editora : Julia Chatarina
