Dosente sira iha FAGRI UNTL deside hapara atividade
DILI, 11 outubru 2024 (TATOLI)–Dosente sira iha Fakuldade Agrikultura (FAGRI) Universidade Nasionál Timor-Lorosa’e (UNTL) konvoka ona reuniaun no deside hapara atividade hotu iha fakuldade ne’e tanba la kontente ho estudante sira-nia liafuan.
Iha loron hirak liubá, Asosiasaun Akadémika Estudantíl iha FAGRI-UNTL, liuhusi konferénsia imprensa, hato’o preokupasaun kona-ba dosente balun ne’ebé serbisu iha fatin rua hodi abandona aula, ho nune’e estudante sira la satisfeitu hodi halo manifestasaun hasoru estrutura fakuldade no hateten katak Asosiasaun Akadémika Estudantíl iha FAGRI sei la tolera dosente malandru iha FAGRI.
“Liafuan estupidu no étika laiha ne’e soke dosente sira hotu iha FAGRI, nune’e sira konvoka reuniaun hodi deside hapara atividade hotu iha FAGRI. Sira dehan dosente malandru, hanesan liafuan soke dosente sira-nia fuan, tanba liafuan ne’e virál iha rede sosiál, entaun halo dosente sira kuandu tama sala sira dehan ami malandru ne’e hanorin imi halo saida,” Dekanu FAGRI iha UNTL, Vicente de Paulo Correia, informa iha ninia knaar fatin, UNTL sentrál, sesta ne’e.
Notísia relevante : Dosente balun iha UNTL abandona aula iha FAGRI
Hafoin ida-ne’e Dekanu FAGRI nota dezenvolvimentu ne’e ladún di’ak, nune’e nia konvoka tan reuniaun ho dosente sira hotu no rona dosente sira nia sentimentu.
“Sira dehan, ami ne’e hanorin iha ne’e tinan naruk, oknum balun mak hanesan ne’e agora estudante sira análiza ami sira katuas eskola doutór sira-ne’e malandru hotu. Entaun, husi enkontru ne’e ami deside hapara hotu atividade eskola nian, la’ós prosesu aprendizajen de’it, maibé kualker atividade orientasaun sira-ne’e ami hapara hotu,” Vicente de Paulo Correia, akresenta.
Nia dehan, kondisaun ne’e nafatin akontese bainhira estudante sira la dada fila sira-nia liafuan iha rede sosiál.
“Kuandu estudante sira la dada fila sira-nia liafuan hodi la husu deskulpa iha rede sosiál, ne’e aula mantein paradu. Ida-ne’e oinsá atu ita hanorin no eduka ita-nia estudante sira. Sira-nia ezijénsia ba sira-nia direitu ne’e ami dosente hotu apoiu maibé liafuan ida dehan dosente iha fakuldade ne’e hotu malandru ne’e mak ami la simu, entaun ita buikota hodi eduka sira,” nia katak.
Dosente ne’e rekoñese, estudante sira hotu iha direitu hodi halo manifestasaun kona-ba saida de’it mak mosu iha instituisaun, maibé tenke ko’alia ho étika no tau sasán iha nia fatin.
“Buat ruma falla temi oknum la’ós temi dosente hotu, ami ne’e imi-nia aman, imi-nia maun oinsá mak imi bele dehan ami ne’e malandru, tanba ami hanorin iha universidade ne’e ba tempu naruk ona,” nia tenik.
Dekanu FAGRI salienta, Dosente no Xefe Departamentu Peska Siénsia no Marinha (DPCM), Abílio da Fonseca, ne’ebé estudante sira kestiona ne’e, daudaun la ativu ona iha fakuldade.
“Seidauk iha desizaun maibé ha’u hanesan dekanu ida, ha’u espera katak tenke iha marka forte ida para hapara ka oinsá, maibé ida-ne’e desizaun leten mak deside,” nia katak.
Iha sorin seluk, estutura Asosiasaun Akadémika Estudantíl FAGRI hamutuk ho estudante ativu no finalista iha DPCM hein rezultadu husi Reitór UNTL ho nia estrutura tomak, atu fó solusaun imediatu ba problema no preokupasaun ida-ne’e.
Jornalista : Osória Marques
Editora : Julia Chatarina
