DILI, 11 outubru 2024 (TATOLI) – Primeiru-Ministru (PM) Austrália, Anthony Albanese, kongratula Governu Timor-Leste ne’ebé susesu organiza simu vizita Sua Santidade Papa Francisco, iha 09 to’o 11 Setembru 2024.
PM Anthony Albanese kongratula durante enkontru bilaterál ho Primeiru-Ministru (PM), Kay Rala Xanana Gusmão iha ámbitu Simeira Association of Southeast Asian Nations (ASEAN) ba dala-44 no 45 iha Sentru Konvensaun Nasionál (NCC, sigla inglés), Repúblika Demokrátika Populár (RDP) Laos, ohin.
“Parabéns ba Timor-Leste ho vizita susesu husi Papa Francisco. Austrália hein katak, Amu-Papa sei vizita mós Darwin,” Albanese hateten.
Anthony Albanese husu kona-bá kalendáriu desizaun adezaun Timor-Leste nu’udár membru plenu ASEAN nian, tanba Austrália mós komprometidu fó apoiu másimu iha prosesu tomak.
Iha fatin hanesan, Xefe Ezekutivu Australianu ne’e ho Kay Rala Xanana Gusmão ko’alia mós kona-ba progresu Greater Sunrise, tanba Austrália iha kompromisu atu servisu hamutuk ho Timor-Leste hodi dezenvolve projetu ne’ebé sai hanesan prioridade TL nian.
Iha fatin hanesan, PM Xanana Gusmão agradese ba PM Austrália ne’ebé levanta kestaun hirak ne’e, ligadu ho projetu Greater Sunrise ne’ebé sei finaliza iha tempu badak.
Kona-bá selebrasaun loron INTERFET nian, PM Xanana konsidera importante no hakarak atu nasaun sira hanesan Malázia no Filipina involve liután hodi halo demonstrasaun no selebra misaun manutensaun pás ida ne’ebé susesu.
Iha selebrasaun aniversáriu Konsulta Populár ba dala-25, Reprezentante Governu Austrália mós marka prezensa mak hanesan Vise Primeiru-Ministru, Richard Marles.
Akompaña PM Xanana durante enkontru ne’e maka Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas no Xefe Gabinete PM, Elizabeth Exposto.
Notisia relevante: PM Xanana dezloka bá Laos partisipa simeira ASEAN ba dala-44
Jornalista: Hortencio Sanchez
Editór: Florencio Miranda Ximenes
