PNTL Viqueque rekolla reseita rihun $9 ba kofre Estadu
VIQUEQUE, 11 outubru 2024 (TATOLI)- Polísia Nasionál Timor Leste (PNTL) munisípiu Viqueque liuhusi Unidade Trazintu rekolla koima hamutuk rihun $9 ba kofre Estadu iha trimestre datoluk.
“Ba trimestre datoluk ne’e unidade tranzitu seguransa rodaviáriu konsege rekolla reseita rihun $9, maka ami hatama ona ba kofre estadu. Daudaun ne’e ami kontinua halo vizilánsia hodi kontrola transporte públiku sira, oinsárespeita sinál tranzitu sira”, Komandante Polísia Nasionál Timor Leste (PNTL) munisípiu Viqueque, supertendente Antonio Rego Fernande, hateten ba Agência Tatoli, iha postu Viqueque Vila, ohin.
Komadante PNTL munisípiu Viqueque ne’e relata, reseita sira-ne’e PNTL rekolla husi utilizadór transporte ne’ebé viola kódigu estrada.
“Tan ne’e, ha’u husu ba abitante kumpri sináil tranzitu, karik la kumpre ami sei foti medida atuasaun bazeia lei númeru 6/2003 kona-ba rejime tranzitu hodi kondena sira ne’ebé viola kódigu estrada”, nia realsa.
Durante ne’e, nia dehan unidade tranzitu hasoru difikuldade hanesan transporte ne’ebé atu tula motorizada sira-ne’ebé preende husi fatin dook hanesan Uatucarbau, Uatulari, Lacluta no Ossu.
“Ho difikuldade sira-ne’e ha’u hato’o ona ba komandu PNTL hodi tau ba atensaun. Espera ba oin komandu bele responde transporte própriu ba unidade tranzitu”, nia espera.
Tuir dadús ekipa unidade tranzitu munisípiu Viqueque na’in-7 ho transporte patrollamentu ida.
Notísia relevante:PNTL Viqueque preparadu asegura seguransa iha loron finadu
Jornalista : Vitorino Lopes da Costa
Editór : Florencio Miranda Ximenes
