DILI, 14 outubru 2024 (TATOLI)—Asosiasaun Akadémika Estudantíl, Fakuldade Agrikultura (AAE-FAGRI) iha Universidade Nasionál Timor-Lorosa’e (UNTL), segunda ne’e, liuhusi konferénsia imprensa ida, husu deskulpa ba dosente sira , nune’e bele reativa atividade ensinu aprendizajen sira.
“Asosiasaun Akadémika Estudantíl, Fakuldade Agrikultura hato’o deskulpa ba dosente sira seluk iha FAGRI ne’ebé sente ofendidu ba liafuan referidu. Espera katak ho Asosiasaun Akadémika Estudantíl nia rekoñese-an ne’e bele hetan perdaun hosi karísimu dosente sira seluk ne’ebé iha FAGRI hodi kontinua hala’o atividade loron-loron nian iha kampus la’o normál hanesan baibain,” Portavós AAE-FAGRI, Anita Campus Gama, hateten iha UNTL sentrál.
AAE-FAGRI hakarak halo esklaresimentu ba korpu dosente sira iha FAGRI ne’ebé sente ofendidu ho liafuan ‘Maladru’ hodi prejudika ba dosente lakohi fó aula ba estudante sira iha FAGRI durante loron hirak liubá, neʼebé ema barak hatene no sai ona tópiku ba públiku iha rede sosiál.
“AAE-FAGRI hakarak atu esklarese klaru ba públiku katak panfletu ho liafuan katak ‘Asosiasaun Akadémika Estudantíl FAGRI sei la tolera dosente malandru Iha FAGRI’, liafuan ida-ne’e iha intensaun atu fó atensaun ba dosente sira hotu iha Fakuldade Agrikultura katak labele kria ka halo tan, tanba sei la tolera ba aktu hanesan problema ne’ebé akontese iha Departamentu Peska. La’ós refere ba karísimu dosente hotu ne’ebé iha FAGRI,” nia esplika.
Asosiasaun nota atensaun públiku ne’ebé balun ladun satisfeitu inklui dosente sira seluk ne’ebé iha FAGRI, tanba konsidera AAE-FAGRI jeneraliza liafuan ba dosente hotu no liafuan ne’e ofende tebes dosente sira seluk.
Nune’e mós, estudante, Arlindo Rodrigues, hateten, AAE-FAGRI rekoñese liafuan malandru ne’ebé fó sai iha konferénsia imprensa maibé ba oknum dosente balun de’it.
“Ita rekoñese liafuan malandru ne’e negativu duni maibé dala-ida tan ita la’ós dedika ba dosente hotu iha Fakuldade Agrikultura, ita dedika ba oknum ne’ebé mak komete duni hahalok sira hanesan ne’e,” Arlindo Rodrigues esklarese.
Notísia relevante : Dosente sira iha FAGRI UNTL deside hapara atividade
Nia dehan konferénsia imprensa ne’ebé hala’o semana hirak liubá ne’e ba dosente Abílio da Fonseca, la’ós jeneraliza ba dosente hotu iha Fakuldade Agrikultura ne’e.
“Tanba ne’e ohin hato’o ona deskulpa nune’e ba oin labele akontese tán hahalok ida hanesan ne’e. Iha afirmasaun husi dosente sira katak Fakuldade Agrikultura ne’e ‘The Best’ iha UNTL. Ha’u la hatene sira fó rezume ida oinsá mak fakuldade ida-ne’e The Best. Maibé realidade ne’ebé iha katak probelema akotese hela de’it no koko ko’alia ho estrutura fakuldade maibé nafatin hela de’it. Maibé ami prontu kolabora ba oin tenke hadi’a,” nia tenik.
Jornalista : Osória Marques
Editora : Julia Chatarina
