COVALIMA, 14 Outubru 2024 (TATOLI) – Ministru Edukasaun Interinu, Domingos Lopes Lemos, halo abertura ba ezame nasionál ba tinan letivu 2024 iha Eskola Sekundária Jerál Públiku Suai.
Iha abertura ne’e, atuál Sekretáriu Estadu Ensinu Sekundáriu no Tékniku Vokasionál ne’e dehan iha ezame ne’e estudante sira rasik mak sei deside nia futuru.
“Ekipa mai halo monitorizasaun ba prosesu ezame nasionál iha Covalima, tanba ne’e ha’u husu ba alunu sira atu estuda, tanba sira na’in rasik mak bele deside sira-nia futuru liuhusi ezame nasionál”, Domingos Lemos dehan iha Suai, ohin.
Governante ne’e mós apela ba alunu sira durante realiza ezame nasionál presiza foku, nune’e bainhira fó sai rezultadu bele pasa ho valór ne’ebé di’ak.
Nia observa katak ezame nasionál ba loron ohin iha Eskola Sekundária Jerál Públiku Suai la’o normál, maske estudante balun la tuir ezame tanba moras.
Ba alunu sira ne’ebé la realiza ezame nasionál iha loron 14 Outubru, sei iha posibilidade atu tuir ezame segunda xamada nian.
Hafoin halo abertura ba ezame nasionál, Domingos Lemos ho ekipa kontinua halo viajen hodi bá halo observasaun ba ezame nasionál iha postu administrativu Fatumea.
Diretór Eskola Sekundária Jerál Públika Suai, Fernando Ferreira, dehan eskola seidauk identifika alunu na’in hira mak la tuir ezame nasionál, tanba ezame ne’e foin hahú ohin. “Ita haree alunu sira tuir ezame nasionál la’o ho di’ak bazeia ba númeru ezame ne’ebé taka iha meza maske balun la tuir ezame no tanba sá, ami seidauk identifika”, nia realsa.
Alunu hamutuk 724 mak realiza ezame iha Eskola Sekundária Jerál Públiku Suai no husi númeru ne’e estudante 653 husi sekundária sentrál, ne’ebé uza saladeaula 34 ho profesór vijilante na’in-68, ne’ebé kada sala koloka manorin na’in-rua. Aleinde ne’e, alunu finalista husi eskola paralela Salele iha na’in-80-resin ne’ebé uza saladeaula lima ho totál profesór vijilante 10.
Eskola sira ne’ebé realiza ezame nasionál iha Covalima maka Eskola Bázika Sentrál (EBC, sigla portugés) 24, eskola sekundária haat no tékniku vokasionál haat.
Totál alunu ne’ebé tuir ezame nasionál hamutuk 2.542, husi númeru ne’e estudante EBC iha 1.362, eskola sekundária 954 no tékniku vokasionál 226.
Tuir dadus nasionál, estudante 58.271 iha territóriu mak ohin realiza ezame nasionál, ne’ebé mai husi ensinu báziku iha alunu 29.252, ensinu sekundáriu jerál 24.894 no ensinu tékniku vokasionál 4.125.
Notísia relevante: Edukasaun Covalima rejista alunu 2.542 realiza ezame nasionál
Jornalista: Celestina Teles
Editora: Maria Auxiliadora
