DILI, 14 outubru 2024 (TATOLI)–Prezidente interinu Autoridade Munisípiu Dili (AMD), Francisco dos Santos, konsidera, presiza iha regulamentu ruma atu halo jestaun ba toilet públiku sira iha merkadu Manleuana no Taibesi.
“Tenke iha regulamentu ruma sai baze ba iha jestaun no atu regulariza funsionamentu,” Prezidente interinu informa ba Agência Tatoli, segunda ne’e.
AMD halo ona proposta ida ba Ministru Administrasaun Estatál (MAE) atubele diskute asuntu ne’e iha Konsellu Ministru hodi bele implementa jestaun ba toilet públiku sira bainhira ema uza.
“Ami hato’o ona ba MAE hodi diskute iha Konsellu Ministru atu hetan aprovasaun hodi nune’e ami bele implementa,” nia akresenta.
Notísia relevante : Membru PN husu AMD hadi’a jestaun merkadu Taibesi
Francisco dos Santos garante katak komunika ona ba jestór merkadu sira atu negosiante sira bele kontribui sentavu 10 ka 25 bainhira tama toilet públiku nune’e bele hadi’a filafali hirak ne’ebé a’at.
“Importante liu mak orsamentu ne’ebé ema hotu kontribui ne’e tama ho transparente, tanba osan ne’e sensitivu. Osan sira tenki alista, pur ezemplu loron-ida ema tama ne’e hira. Osan sira bele uza se toilet nakonu karik selu karreta hasai foer husi sintina,” nia tenik.
Nune’e mós, karik buat ruma a’at karik bele utiliza osan hodi hadi’a tanba kontribuisaun sira ne’e atu fasilita nafatin jestaun no iha kontinuasaun ba manutensaun fasilidade sira ne’ebé entrega ona ba jestaun merkadu.
Iha sorin seluk, Jestór Merkadu Manleuana, Saturnino Henrique de Fátima, hateten, presiza halo jestaun ba toilet públiku iha merkadu Maneleuana, nune’e bainhira ema uza toilet bele fó kontribuisaun.
“Bainhira tama no uza toilet ho objetivu ida atu hadi’a fali, se iha loron ida estraga. Kada ema tama toilet atu selu sentavu 25, maibé ita presiza lei ka baze legál ruma ba ema hotu. Lei iha tiha mak bele no presiza iha aprovasaun mak implementa. Ita iha planu maibé iha mos lei ruma mak di’ak,” nia katak.
Jestaun Merkadu Manleuana hetan ona autorizasaun husi Prezidente Autoridade Munisípiu Dilu kona-ba jestaun toilet públiku maibé seidauk implementa tanba presiza iha lei ruma.
Jornalista : Jesuína Xavier
Editora : Julia Chatarina
