DILI

Membru PN husu AMD hadi’a jestaun merkadu Taibesi

Membru PN husu AMD hadi’a jestaun merkadu Taibesi

Situasaun iha Merkadu Taibesi hafoin ekipa Jestaun Merkadu Taibesi muda obrigatóriu vendedór ambulante sira ba fa'an iha estasionamentu karreta nian iha Merkadu Taibesi, kuarta (29/03). Imajen Tatoli/Francisco Sony.

DILI, 10 juñu 2024 (TATOLI)—Membru Parlamentu Nasionál (PN) liuhusi Deputada PLP, Maria Angelina Samento, kontinua husu ba Autoridade Munisípiu Dili (AMD) ho ekipa  jestaun merkadu atu hadi’a jestaun merkadu Taibesi.

Notísia Relevante: Empreza Walgen no Reyna reabilita merkadu Taibesi no Manleuana iha semana oin

“Hanesan, iha semana rua, ha’u foti ona merkadu Taibesi  kona-ba jestaun merkadu munisípiu Dili tenke haree didi’ak fatin ne’ebé mak sai estasionamentu ba karreta. Depois, ha’u foti iha ne’e, liuhusi semana rua ba haree fila-fali nafatin, tanba fatin ne’ebé mak sai estasionamentu ne’e karreta sei kontinua para. Fatin ne’e utiliza ba faan roupa, faan hahán no modo-tahan no modo-tasa,” Nia levanta liuhusi reuniaun plenária Parlamentu, segunda ne’e.

Nia hateten, vendedór kahur malu entaun tenke ordena didi’ak merkadu Taibesi, entaun iha ne’e kauza karreta sira labele para tuir dalan, liuliu transporte públiku sira no transporte privadu laiha fatin atu para, kauza engarafamentu iha merkadu liuliu iha loron sábadu no domingu.

Ne’ebé, nia dehan, Autoridade Munisípiu Dili (AMD) hamutuk ho jestaun merkadu presiza ba haree merkadu sira oinsá mak organiza ho didi’ak.

Aleinde ne’e, nia hateten, presiza organiza didi’ak vendedór sira atu labele hela fali iha merkadu laran, tanba se lae sira faan sasán sai mós hanesan uma hela fatin atu sira hela permanente iha merkadu laran.

Deputada FRETILIN, Mariquita Soares, sekunda mós katak presiza hadi’a jestaun merkadu Taibessi tanba iha semana kotu ne’e, nia-parte ba iha merkadu Taibesi no estasionamentu karreta nian ne’e negosoiante sira okupa hotu.

Tuir nua, mezmu trasporte públiku sira tama iha ne’eba tenke kontribui selu taxa maibé laiha espasu atu karreta sira-ne’e para bá, tanba ne’e hanoin jestaun ne’e importante atu bele tau atensaun.

Deputadu CNRT, Gabriel Soares, hateten nia parte apoiu nafatin no Sekretáriu Estadu Toponímia no Organizasaun Urbana (SEATOU) hodi organiza sidade Dili, hodi husu atu kontrola negosiante no loza sira-ne’ebé konstrui iha fatin trotoár leten.

Deputadu CNRT, Mateus da Cruz Carvalho, preokupa ho negosiante ambulante ne’ebé kontinua faan sasán iha dalan ninin hanesan Elemloi, Bairru Bite, Kampu Baru iha tempu lokra’ik halo engafaramentu tebes, mezmu ekipa SEATOU iha fulan hirak liu ba tun ona duni negosiante sira maibé hafoin ne’e agora kontinua faan nafatin.

“Nune’e, ami husu atu kria kondisaun ba negosiante sira iha fatin dignu hodi labele faan tan iha dalan ninin,” nia dehan.

Vise Ministru ba asuntu Parlamentár, Adérito Hugo da Costa, rejista preokupasaun sira husi membru PN sira hodi enkamina ba entidade tutela.

Notísia Relevante: MCI iha tinan-ne’e halo manutensaun ba Merkadu Taibesi no Manleuana

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!