Governu Portugál konsidera Timor-Leste nu’udar portaun entrada iha Ázia Pasífiku
LISBOA, 14 outubru 2024 (TATOLI) – Governu Portugál konsidera Timor-Leste nu’udar nasaun inportante tanba futuru bele sai portaun entrada ba Ázia Pasífiku.
Primieru Ministru Repúblika Portugál, Luís Montenegro, esplika, Timor-Leste nia polítika internasionál hanesan atu sai membru permanente iha organizasaun ASEAN ne’e nu’udar oportunidade tanba bele halo ligasaun entre asaun sira hanesan CPLP hodi hametin liutan relasaun entre nasaun sira iha Europa no Áfrika.
“Hau felisita Primeiru Ministru Xanana Gusmao, ho nia lideransa durante ne’e, espera antes mandatu Xefe governu remata Timor-Leste bele ona sai membru permanente iha ASEAN ,” Primeiru Ministru Repúblika Portugál hateten iha Lisboa, tersa ne’e.
Portugál kontinua akompaña situasaun ne’e no sempre apoia Timor-Leste nia polítikatika internasionál sira liuliu prosesu adesaun ba organizasaun ASEAN ne’ebé atualmente Timor-Leste sei sai membru observadór no ho esperansa bele sai membru permanente iha organizasaun referida.
Timor-Leste nia polítika adere ba ASEAN ne’e sai momentu inportante mos ba Portugál hodi aproveita halo relasaun bilaterál ho nasaun hotu iha ASEAN no ASIA Pasífika.
Portugál nu’udar país ne’ebé úniku husi Eropea ne’ebé estabdlese embaixada iha Dili nune’e hala’o mos misaun diplomasia hanesan serbí institusaun, emprezáriu sira no povu husi nasaun rua hanesan nafatin sai portaun entrada ba Timor-Leste iha Europea.
“Portugál ho Timor nu’udar País maun-alin, ne’ebé iha komitmentu valoriza demokrasia, dereitu umanu no paz inklui valoriza ema,” Montenegro akresenta.
Xefi Governu Portugál hato’o bemvindu ba komitiva governu Timor-Leste liuhusi vizita ofisiál ne’ebé sei halo misaun akordu kooperasaun entre ministéiru sira husi nasaun rua.
Timor-Leste rasik hato’o pedidu atu sai membru ASEAN iha tinan-2011 no iha tinan-2021 Timor-Leste sai nu’udar membru observadór hodi hein kompleta tan rekezitus sira antes sai membru permanente iha ASEAN.
ASEAN rasik iha membru permanente hamutuk nasaun 10 kompostu Cambodia, Indonézia, Laos,Vietnam, Brunei Darusalam, Singapura, Myanmar, Filipina no Thailandia.
Notísia relevante: Timor-Leste-Portugál asina nota kooperasaun estratéjiku tinan 2024-2028
Jornalista : Natalino Belo
Editór : Evaristo Soares Martins
