LISBOA, 14 outubru (2024) – Governu Portugál hamutuk ho Timor-Leste, tersa ne’e, realiza sorumutu hodi fortifika relasaun bilaterál liuhusi asina nota kooperasaun ba planu estratéjiku tinan-haat husi 2024 to’o 2028.
Primeiru Ministru Repúblika Portugál, Luís Montenegro, kongratula ba Xefe governu Timor-Leste, Kay Rala Xanana Gusmao tanba bele hakat ain hikas iha rai Portugál nu’udar xefe governu hodi realiza vizita traballu inklui asina akordu entre governu Portugál no Timor-Leste.
Relasaun forte ne’ebé nakonu ho amigável, kooperasaun no solidariedade,” Primeiru Ministru Repúblika Portugál hateten iha Lisboa, tersa ne’e.
Xefi governu Portugál hato’o agradese mos ba povu Timor-Leste nia solidaridade ba Portugál relasiona ho trajédia kasual la carte ne’ebé akontese iha Portugál, situsaun tempu ne’ebá Timor-Leste apoia orsamentu ne’ebé sai símbolu nu’udar maun-alin.
Liuhusi vizita ne’ebé halao iha Portugál, tersa ne’e Governu rua, rezulta asinatura instrumentu ne’ebé iha siknifikatifu bo’ot hanesan Portugál ho Timor-Leste inisia hamutuk Planu kooperasaun stratejiku tinan-haat husi 2024 to’o 2028 ne’ebé aloka orsamentu milaun $75 no sei aumenta millaun $5.
Governu Portugál kompromete ajuda Timor-Leste no konkista estadu ne’ebé foun no modernu liuliu iha área edukasaun tanba sai pilar inportante durante kooperasaun hanesan ensinu lian portugés, reforsa protokolu aprenizajem eskola CAFE no tinan oin sei kontinua konstrui eskola foun Portugés iha Dili.
“Ida-ne’e hanesan motivasaun husi governu Portugál iha setór edukasaun, siensia no inovasaun,” Luis Montenegro akresente.
Governu Portugál nafatin iha komitmentu apoia Timor-Leste iha setór justisa ne’ebé governu anterior establese ona nune’e ba oin sei kontinua no governu Portugál nafatin ajuda iha setór ekonomia hanesan deversifikasaun no valoriza setór estratéjia no turismu.
Kooperasaun seluk ne’ebé tinan-oin sei realiza mak setór infraestrutura ne’ebé sai determinasaun hanesan aumenta kapasidade Timor-Leste iha kontektu rejionál no global.
Governu Portugál mos valoriza Timor-Leste nia kooperasaun konstrutivu hanesan komunidade pais lian portugés (CPLP,sigla Portugál) inklui organizasaun internasionál seluk iha mundu no apoia nafatin desizasaun atu adere ba ASEAN lideradu Xanana Gusmao.
Governu Timor-Leste no Portugál asnina nota, kooperasaun hanesan planu estratejiku tinan-haat 2024 to’o 2028 ne’ebé halao husi ho Ministru Estadu Negosiu Estranjeiru Portugál, Paulo Rangel ho Ministru Negósiu Estranjeiru no Kooperasaun (MNEK), Bendito Freitas.
Asina nota kooperasaun kona-ba dezenvolementu no implementasaun programa derive ne’ebé halao entre Vise Primeiru Ministru Timor-Leste atúal Ministru Koordenadór Asuntu Ekonomia, Turismu no Ambiente, Francisco Kalbuadi Lay ho Ministru Ekonomia Portugál, Pedro Reis.
Alende ne’e, asina kooperasaun entre Ministru Negosiu Estranjeiru no Kooperasaun Timor-Leste, Bendito Freitas ho Ministru Kooperasaun Estranjeiru, Paulo Rangel iha área infraestrutura ne’ebé asina mos husi Ministru Planeiamentu Investementu Estratéjiku (MPIE), Gastao Sousa.
Governu liuhusi reuniaun konsellu ministru aprovo ona programa kooperasaun entre nasaun rua hanesan nota kooperasaun programa estratéjiku tinan-2024 to’o 2028, ho objetivu ba dezenvolvimentu sustentável iha Timor-Leste.
Programa estratéjiku tinan-haat ne’e foku ba área prioridade sira ho halo intervensaun iha “Clusters” prinsipál lima hanesan dezenvolvimentu umanu iha setór edukasaun, saúde, inkluzaun sosiál no kulturál.
Seluk mak, estadu direitu no boa governasaun, liuliu iha setór justisa no seguransa, programa administrasaun, Finansa públika no desentralizasaun, programa ba Juventude no empregu.
Programa dalima mak, oseanu, sustentabilidade no infraestrutura ambientál, protesaun ba biodeversidade no dezenvolvimentu ekonomia azul.
Partisipa iha sorumutu entre governu rua kompostu membru governu sira-ne’ebé akompaña Primeiru Ministru, Xanana Gusmão hanesan Vise Primeiru Ministru atúal Ministru Koordenadór Asuntu Ekonomia, Turismu no Ambiente, Franncisco Kalbuadi Lay.
Ministru Negosiu Estranjeiru no kooperasaun, Bendito Freitas, Ministru Justisa, Sergio Ornai, Ministru Ensinu Superiór, Siénsia o Kultura, José Honorio, Ministru Interior, Francisco Guterres no Sekretáriu Estadu Komunikasaun Sosiál, Expedito Díaz Ximenes.
Notísia relevante: Governu Timor-Leste konsidera Portugál importante iha relasaun bilaterál
Jornalista : Natalino Belo
Editór : Evaristo Soares Martins
