BOBONARO, 14 outubru 2024 (TATOLI) – Negosiante sira husu Governu no Autoridade Munisípiu Bobonaro atu tau-matan hodi konstrui mini merkadu Ili-Bole, ne’ebé lokaliza iha área baliza entre suku Oe-eleu, postu administrativu Bobonaro no suku Raifun, postu administrativu Maliana, tanba barraka ne’ebé negosiante sira harii la dignu ona atu halo atividade negósiu.
Elsa Sose Mau, nu’udar negosiante husi aldeia Raifun foho, preukupa tanba tempu bailoro uma barraka ne’ebé sira harii rasik anin sobu beibeik no tempu udan mós labele halo atividade negósiu ho di’ak.
Notísia relevante: Xefe Suku Oe-leu husu Governu konstrui merkadu lokál Ilibole
“Tempu anin ne’e ami fa’an ladi’ak, tanba ta’uk anin mai foti hotu uma sira-ne’e, uma oan ida halo ho ai ki’ik, depois kalen tuan sira hanesan labele tahan ho anin, dalaruma ami fila uma, dadeer mai buka kalen balu anin lori lakon tiha, kuandu udan fali mós la di’ak nafatin tanba kalen ne’ebé ami prega iha leten ne’e ku’ak hotu ona, ne’ebé udan mai turuk ami fa’an ladi’ak, ami husu ba na’i-ulun sira sé bele halo netik ami-nia fatin di’ak ida, nune’e ami fa’an ho seguru,” nia informa ba TATOLI iha iha Ilibole, segunda ne’e.
Sose Mau dehan, haree ba kondisaun barraka ne’e, sira sente tauk liha tempu anin boot, maibé tanba moris ho fa’an modo atu sustenta nesesidade família no oan sira-nia eskola, obrigatóriu halo de’it ona maske vida iha ameasadu.
“Ita la fa’an ne’e agora, kalan loron labarik sira atu haan saida, eskola hodi saida, ne’ebé pasiénsia ta’uk mós fa’an de’it ona, ami iha hanoin atu halo rasik uma di’ak, mas labele, kbiit lato’o, ita fa’an de’it modo $0,50 ne’e,” nia hateten.
Biban hanesan, negosiante Cesaltina dos Santos, informa, iha tinan hirak liubá Governu konsege konstrui ona merkadu foun, maibé durante ne’e la utiliza tanba distánsia dook husik estrada.
“Uluk ami fa’an iha-ne’ebá, ema mai ho karreta ka motorizada mós la’o liu de’it, la sosa ida, to’o lokraik modo, hudi ho krupuk sira ne’e ami lori fila-fali de’it, tanba ne’e mak ami muda mai iha-ne’e, ternyata ami muda mai ema hola di’ak loos,” nia katak.
Cesaltina mós rekomenda ba Governu atu kria mos kondisaun hanesan sintina no hariis-fatin públiku iha merkadu ne’e.
“Ami iha-ne’e bee sai estraga de’it, sintina mós iha maibé aat ona, dalaruma ema ho karreta Anguna mai tún haan supermi, pop mie atu ba sintina araska loos, balu pasiensia naran ba du’ut laran deit ona,” nia dehan.
Enkuantu uma ne’ebé negosiante sira harii forma liña hamutuk unidade 20-resin, husi númeru ne’e balu utiliza ba fa’an modo no produtu lokál no seluk tan no balu ne’ebé kondisaun di’ak hanesan kioske hodi fa’an supermi, pop mie ho sasán nesesidade bázika seluk.
Negosiante hirak-ne’ebé halo atividade negósiu iha merkadu ne’e mai husi suku Oe-leu no aldeia Raifun foho, suku Raifun.
Notísia relevante: Kondisaun estrada Galusapulu halo negosiante merkadu lokál Ili-Bole ladún hetan rendimentu
Jornalista: Sérgio da Cruz
Editór: Evaristo Soares Martins
