Aldeia neen iha Zumalai seidauk asesu enerjia elétrika
COVALIMA, 15 Outubru 2024 (TATOLI) – Aldeia neen iha postu administrativu Zumalai, munisípiu Covalima seidauk asesu enerjia elétrika, nune’e sira kontinua uza lampu tradisionál.
Administradór Postu Zumalai, Alípio Magno, informa aldeia neen ne’ebé la asesu liña eletrisidade mak iha suku Fatuleto, aldeia Biata no Betama, suku Lepo, aldeia Baulolo no Horba, no suku Lour, aldeia Pelet no Somo-kanua.
“Komunidade iha postu Zumalai maioria asesu ona liña eletrisidade, falta aldeia neen mak seidauk asesu, nune’e ha’u nafatin esforsu oinsá mak komunidade bele asesu hotu eletrisidade”, Alípio Magno dehan ohin.
Autoridade ne’e salienta katak populasaun ne’ebé seidauk asesu liña eletrisidade ne’e nafatin moris iha nakukun laran no sira uza de’it lampu tradisionál no solar cell hodi bele hetan naroman iha tempu kalan.
Tanba ne’e, nia nafatin halo koordenasaun ho Eletrisidade Timor Leste, Empreza Públika (EDTL, E.P) hodi dada liña eletrisidade, nune’e komunidade bele hetan naroman.
Postu Zumalai iha nia suku ualu mak hanesan Zulo iha aldeia lima, Fatuleto iha aldeia lima, Mape haat, Lour ualu, Lepo lima, Ucecai rua, Tashilin haat no Raimea haat.
Xefe Unidade EDTL, E.P, Anorito Mendonça, rekoñese katak la’ós komunidade postu Zumalai mesak mak la asesu eletrisidade, maibé iha postu Suai, suku Beco nia aldeia balun mós seidauk iha liña eletrisidade.
“Komunidade ne’ebé seidauk asesu eletrisidade iha Covalima daudaun ne’e tama ona iha prosesu konkursu no hein de’it ona empreza sira ne’ebé sai manán-na’in atu hahú serbisu”, nia adianta.
Munisípiu Covalima iha nia postu Fatululik, Fatumea, Fohorem, Maucatar, Tilomar, Suai no Zumalai. Iha suku 30, aldeia 148, ne’ebé maioria asesu ona eletrisidade no falta aldeia balun mak seidauk.
Notísia relevante: Aldeia 11 iha Covalima seidauk asesu ba liña eletrisidade
Jornalista: Celestina Teles
Editora: Maria Auxiliadora
