Dekanu rekoñese Departamentu Siénsia Peska no Mariña UNTL seidauk iha dosente espesializada
DILI, 15 outubru 2024 (TATOLI)—Dekanu Fakuldade Agrikultura (FAGRI) iha Universidade Nasionál Timor-Lorosa’e (UNTL), Vicente de Paulo Correia, rekoñese katak Departamentu Siénsia Peska no Mariña seidauk iha dosente espesializada ba área referida.
“Daudaun ema espesialista ba peska laiha. Ita iha graduasaun ona ba grupu rua, agora tinan-ida ne’e iha dezembru ita gradua tan grupu ida. Loke departamentu foun maibé saladeaula laiha fakuldade leten ne’ebá, ema atu duni sai sira, Turizmu sala laiha sira mai hotu iha ne’e, direitu sala laiha ne’ebé agora ami araska,” Dekanu informa iha ninia knaar fatin Colmera, tersa ne’e.
Notísia relevante : Estudante 600-resin iha Departamentu Peska no Siénsia Mariña ezije dosente iha área espesífika
Diretór Ezekutivu Ajénsia Nasionál Avaliasaun Akreditasaun Akadémika (ANAAA), Nilton Paiva Mau, hateten, nia parte seidauk iha informasaun kona-ba fó akreditasaun ba Departamentu Siénsia Peska no Mariña no sei hein prosesu iha Ministériu Ensinu Superiór Siénsia no Kultura (MESSK).
“Ami seidauk iha ajenda para ba akredita tanba kona-ba mariña lisensiamentu operasionál ne’e bainhira akredita nia hetan ona lisensa operasionál, ne’ebé ami seidauk ba iha Departamentu Peskas Mariña nian. Ha’u hanoin mariña ne’e ami bazeia ba lisensa operasionál depois mak hetan akreditasaun maibé to’o agora ami seidauk ba tanba ami seidauk hetan informasaun detallu,” nia akresenta.
Bainhira iha ona lisensa operasionál maka hein de’it graduadu, hafoin ANAAA monitoriza no hakerek liuhusi prosesu rigór mak fó akreditasaun.
Nia dehan, fó ona graduasaun ba finalista ne’e la kontra regra tanba sira hetan ona lisensa operasionál husi Ministériu, nune’e sira bele uza lisensa ne’e hodi gradua hafoin mak ANAAA fó akreditasaun.
“Se nia mak komentáriu ne’e hanesan nia rekoñese frakeza ne’ebé mak imi husu, tanba ne’e mak hanesan formalmente ha’u labele fó komentáriu tanba ami komentáriu ne’e bainhira ami hasoru faktu iha terrenu no bainhira hetan ona akreditasaun. Fakuldade Agrikultura ne’e hetan akreditasaun maibé departamentu peska ne’e seidauk hetan maibé hetan ona lisensa husi Ministériu,” nia informa.
Jornalista : Osória Marques
Editora : Julia Chatarina
