Kargu xefia sira iha Covalima aprofunda koñesimentu kona-ba elaborasaun planu asaun munisipál
COVALIMA, 15 Outubru 2024 (TATOLI) – Ministériu Administrasaun Estatál (MAE), liuhusi Diresaun Nasionál Formasaun no Kooperasaun partilla informasaun kona-ba matadalan ba elaborasaun planu asaun munisipál ba kargu xefia sira iha Covalima.
Xefe Departamentu Formasaun no Kooperasaun MAE, Xisto Domingos Freitas, dehan haktuir ba Dekretu-lei númeru 49/2023, 23 Agostu, kona-ba orgánika MAE iha artigu 34 hateten Diresaun Nasionál Formasaun no Kooperasaun mak introdús formasaun iha nasionál no iha munisipál sira.
“Formasaun ida-ne’e importante, nune’e oinsá diretór sira bele elabora planu asaun anuál kada tinan liuhusi formasaun ba funsionáriu públiku sira”, Xisto Freitas hateten iha Bairru Costa, ohin.
Dirijente ne’e esplika katak diresaun ne’e foin estabelese iha 2023, aleinde fó formasaun, rona mós rekomendasaun husi diretór munisipál sira kona-ba tipu formasaun ne’ebé presiza atu disponibiliza liga ba ajenda administrasaun públika no funsionáriu kazuál sira.
Nune’e, diresaun presiza koopera ho Institutu Nasionál ba Administrasaun Públika (INAP), ne’ebé forma funsionáriu sira iha área jenérika no MAE haree ba iha área espesífika sira.
MAE fahe ona esperiénsia matadalan ba elaborasaun planu munisipál ne’ebé kuaze hala’o hotu ona iha munisípiu sira, falta Ainaro, Ataúro, Dili no Rejiaun Administrativa Espesiál Oe-Cusse Ambeno (RAEOA).
Diretór Servisu Munisipál ba Administrasaun Rekursu Umanu, José Manuel Gonçalves, dehan MAE presiza fó formasaun kona-ba matadalan elaborasaun planu munisipál ba formasaun rekursu umanu.
“Formasaun ne’e parte-ida atu diretór sira bele koñese di’ak liu hodi elabora planu asaun anuál atu prevee orsamentu hodi kapasita formasaun ba funsionáriu públiku no kazuál iha idaidak nia diresaun”, realsa.
Tuir dadus, funsionáriu públiku ne’ebé presta sira-nia serbisu iha Covalima hamutuk 223, husi númeru ne’e na’in-34 tama ona idade reforma.
Jornalista: Celestina Teles
Editora: Maria Auxiliadora
