DILI, 15 outubru 2024 (TATOLI)–Diretór Jerál Desentralizasaun Governu Lokál iha Ministériu Administrasaun Estatál (MAE), António Guterres, informa Governu liuhusi MAE halo ona verifikasaun ba uniforme ka farda ba autoridade lokál (xefe suku) sira-ne’ebé empreza suku.
Nia hateten, empreza suku hotu ona no entrega ona uniforme ne’e ba iha MAE ne’ebé kompostu husi farad ho modelu rua mak kamiza ka faru liman naruk ida, liman badak ida, kazaku ida no inklui sapatu ida ba xefe suku sira.
“Ohin verifika tiha ona nia modelu no kualidade ho nia kór hena ba vestuariu ne’e no sei distribui iha tempu badak,” Diretór Jerál Desentralizasaun Governu Lokál iha Ministériu Administrasaun Estatál (MAE), António Guterres, hateten ba jornalista hafoin formasaun kona-ba komunikasaun ba funsionáriu MAE nian, iha Fatuhada.
Xefe suku sira hahú fó medida farda sira iha loron 04 jullu 2014 ba empreza hodi foti medida kada xefe suku atu bele suku uniforme sira-ne’e.
Governu liuhusi MAE aloka orsamentu hamutuk rihun $300 hodi halo konkursu ba públiku atu suku farda ka uniforme ba xefe suku sira.
Total xefe suku sira iha teritóriu laran hamutuk 422 ne’ebé mak sei hetan uniforme foun hodi hala’o serbisu nu’udár autoridade lokál.
Notísia Relevante: Governu prevee rihun $300 ba uniforme autoridade lokál sira-nia
Jornalista : Jesuína Xavier
Editór : Cancio Ximenes
