DILI, 22 Jullu 2024 (TATOLI) – Diretór-Jerál Ministériu Administrasaun Estatál (MAE), António Guterres, informa Governu aloka ona rihun $300 atu suku farda ba xefe suku sira iha munisípiu hotu.
António Guterres dehan farda ne’e iha modelu rua mak hanesan liman badak no naruk, inklui sapatu ba xefe suku sira.
“Osan ne’e husi Governu hamutuk rihun $300, bainhira osan liu millaun $1 ba leten mak presiza konkursu públiku nasionál, maibé osan ida ne’e ki’ik. Iha ona empreza manán-na’in ba suku farda”, António Guterres adianta ba Tatoli, iha Hudi-Laran, Dili.
Nia esplika katak empreza manán-na’in hahu ona sukat uniforme ba autoridade lokál sira hahu iha loron 04 fulan ne’e. “Hahú loron rua iha Dili, depois bá munisipiu sira no sei termina iha fulan-Agustu iha Ataúro. Xefe suku sira hein fulan tolu ka haat hodi bele simu sira-nia farda”, nia relata.
Iha fatin hanesan, xefe suku Fahisoi, postu administrativu Remexio, munisípiu Aileu, Nelson Carvalho, hateten ekipa husi alfaiate tuun diretamente bá postu administrativu idaidak hodi sukat ona sira-nia medida. “Farda ba ami mak hanesan faru, kalsa no sapatu”, nia realsa.
Nia salienta katak empreza fó hatene ona ba sira katak, antes tama ba iha 2025, xefe suku sira sei simu sira-nia uniforme hodi bele utiliza.
Jornalista: Jesuína Xavier
Editora: Maria Auxiliadora
