Reitór UNTL hatun despaisu ba dosente Abílio
DILI, 15 outubru 2024 (TATOLI)—Reitór Universidade Nasionál Timor-Lorosa’e (UNTL), João Soares Martins, hatun ona despaisu atu foti desizaun ba Xefe Departamentu Peska Siénsia no Mariña (DPCM), Abílio da Fonseca, relasiona ho preokupasaun husi estudante sira durante ne’e.
“Dosente ne’e despaisu husi reitór tun ona, no iha despaisu ne’e iha pontu tolu ne’ebé mak importante, katak ita termina komisaun ida atu avalia pedidu suspensaun preventiva ba arguidu ne’e ho prazu 24 oras (ne’e katak rápidu oituan para atu suspende ninia kargu nu’udar Diretór Departamentu), ida mós determina komisaun instrusaun atu elabora notifikasaun akuzasaun ho prazu loron-lima, ida tan mak determina katak prosesu disiplinár tenke ramata iha prazu másimu loron-30, sura husi loron notifikasaun ba despaisu ida-ne’e,” Dekanu FAGRI iha UNTL, Vicente de Paulo Correia, informa iha ninia knaar fatin, tersa ne’e.
Notísia relevante : AAE-FAGRI UNTL husu deskulpa ba dosente sira ne’ebé sente ofendidu
Nune’e, atividade iha fakuldade hahú la’o normál filafali ona tanba estudante sira rekoñese-an hodi husu ona dekulpa ba korpu dosente sira.
“Atividade sira-ne’e ita hapara tanba liafuan ne’ebé estudante sira ko’alia ne’e ladún di’ak, ne’ebé horiseik estudante sira halo ona konferénsia imprensa no dada fila ona sira-nia liafuan no husu ona deskulpa ba dosente hotu, entaun horiseik lorokraik ne’e kedas ami konvoka reuniaun ho Konsellu Diretivu hodi deside reativa fali atividade sira ne’e nune’e la’o normál fali ona. Ida-ne’e oinsá ita atu hanorin sira katak imi bele halo protesta saida de’it la bandu, maibé tenke kuidadu ho liafuan ne’ebé ofende ema seluk,” Dekanu FAGRI akresenta.
Parte fakuldade foti medida hodi rezolve lalais tanba prevene estudante sira seluk halo fali asaun ba nia maluk estudante ne’ebé halo protestu ne’e.
“Prosesu sira-ne’e mak ita halo, ita labele sakrifika atividade tanba ita tauk mak labarik seluk kona hotu impaktu sira-ne’e no baku malu fali ho sira-nia maluk ida halo protestu ne’e problema komplikadu liután, entaun ita lalais oituan nune’e normaliza fali atividade hotu,” Dekanu tenik.
Iha sorin seluk, Senadu Fakuldade Agrikultura, Arlindo Rodrigues, hateten, Asosiasaun Akadémika Estudantíl FAGRI rekoñese liafuan ne’ebé fó sai iha konferénsia imprensa maibé ba oknum dosente balun de’it.
“Ita rekoñese liafuan malandru ne’e negativu duni maibé dala-ida tan ita la’ós dedika ba dosente hotu iha Fakuldade Agrikultura, ita dedika ba oknum ne’ebé mak komete duni hahalok sira hanesan ne’e,” nia katak.
Jornalista : Osória Marques
Editora : Julia Chatarina
