Kandidatu traballadór Austrália tenke tuir formasaun lia-inglés ho sériu

COVALIMA, 16 Outubru 2024 (TATOLI) – Sekretaria Estadu Formasaun Profisionál no Empregu (SEFOPE) Covalima halo abertura ba formasaun lia-inglés ba kandidatu traballadór Austrália hamutuk 270. Iha atividade ne’e, reprezentante Diretór SEFOPE, Alexander de Yesus, husu ba kandidatu sira atu partisipa ho sériu, nune’e bainhira remata formasaun bele preparadu atu bá serbisu hodi hadi’ak moris.

“Aproveita oportunidade hodi tuir formasaun ne’ebé fasilita husi SEFOPE, tanba formasaun ne’e halo ho fazeadamente, nune’e etapa dahuluk kandidatu traballadór na’in-270 mak tuir”, Alexander de Yesus hato’o iha Eskola Tékniku Vokasionál Akar-Laran, ohin.

Dirijente ne’e enkoraja joven sira labele hakarak buka serbisu iha instituisaun Estadu de’it, maibé presiza buka serbisu iha empreza privada sira hanesan sai traballadór iha estranjeiru ho intesaun atu hadi’a moris.

Kandidatu traballadór husi Covalima ne’ebé rejistadu iha sistema SEFOPE Covalima hamutuk 1.284, husi númeru ne’e na’in-270 mak tuir ona formasaun lia-inglés iha faze dahuluk.

Traballdór sira ne’e partisipa formasaun durante fulan tolu, hahú Outubru to’o Dezembru, hafoin kontinua formasaun faze daruak ni’an to’o remata.

Koordenadór formasaun lia-inglés Covalima, José de Araujo Amaral, dehan formasaun ne’e hahú iha segunda to’o sesta no la’o durante oras rua nia laran.

“Ita-boot sira tuir formasaun labele falta. Bainhira laiha informasaun ba formadór sira, ami sei apaga ita-boot sira-nia naran, tanba atu bá serbisu iha rai-li’ur presiza iha koñesimentu iha lia-inglés”, nia fó hanoin.

Diretór Eskola Tékniku Vokasionál Akar-Laran, Paulo Gusmão, reforsa katak eskola oferese saladeaula mamuk ba kandidatu trabaladór Austrália atu kapasita nia aan iha dalen ne’e.

“Atu bá serbisu iha rai-li’ur, traballadór presiza hatene inglés tanba língua ne’e hanesan lia internasionál. Aleinde serbisu iha Austrália bele mós serbisu iha nasaun sira seluk ne’ebé presiza traballadór timoroan”, nia realsa.

Tuir dadus, kandidatu traballadór Covalima atu bá serbisu iha Australia iha na’in-3.185, husi númeru ne’e traballdór ne’ebé nia valór di’ak hamutuk 658 no valór sufisiente 1.932 mak sei tuir formasaun lian inglés.

Notísia relevante: SEFOPE Covalima presiza aprezenta dadus traballadór iha Austrália-Koreia Súl

Jornalista: Celestina Teles

Editora: Maria Auxiliadora