LISBOA, 16 outubru 2024 (TATOLI) – Ministériu Edukasaun (ME), mantein kooperasaun ho Institutu Camões iha área formasaun hodi kontinua kapasita profesór sira iha Timor-Leste.
Ministra Edukasaun, Dulce de Jesús, esplika, prezensa iha Repúblika Portugál nu’udar parte husi vizita ofisiál ne’ebé lideradu husi Xefi Guvernu Timor, Kay Rala Xanana Gusmao ho objetivu atu asina nota kooperasaun entre governu Timor-Leste ho Portugál.
“Ministériu Edukasaun hala’o enkontru ho Institutu Camões iha Lisboa hodi ko’alia kona-ba kontinuasaun husi programa ne’ebé hanaran pro-portugés,” Ministra Edukasaun hateten iha Lisboa, tersa ne’e.
Sorumutu referida hanesan parte kontinuasaun husi rezultadu akordu entre nasuan rua ne’ebé realiza ona asinatura nota kooperasaun estratéjiku ba tinan-haat 2024 to’o 2028.
Programa Pro-Portugés implementa husi Ministériu Edukasuan liuhusi Institutu Formasaun Profesór (INFORDEPE), kapasitasaun ba profesór sira to’o hamutuk rihun 50-resin iha Timor-Leste.
“Governu rua asina ona nota kooperasaun, ohin ami kontinua kedas enkontru tékniku, ida-ne’e la’ós projetu foun maibé kontinuasaun deit,” Dulce akresenta.
Ministériu Edukasaun konsidera projetu Pro-Portugés iha rezultadu ne’ebé di’ak ba profesór sira tanba parte husi preparasaun no kapasita koñesimentu rekursu umanu iha lian Portugés ne’ebé sai nu’udar lian ofisiál iha Timor-Leste.
Nota kooperasaun estratéjiku entre Timor-Leste ho Portugál ba tinan-haat iha área Edukasaun foka ba formasaun profesór no reforas lian portugés.
Notísia relevante: Governu Portugál konsidera Timor-Leste nu’udar portaun entrada iha Ázia Pasífiku
Jornalista : Natalino Belo
Editór : Evaristo Soares Martins
