DILI, 16 outubru 2024 (TATOLI)– 16 Outubru hanesan loron Nasionál ba liberdade imprensa, ho nune’e Prezidente Repúblika, José Ramos-Horta, husu ba jornalista timoroan hotu atu servisu ho di’ak no profisionalizmu.
“Jornalista timoroan sira kontinua imi nia servisu, ha’u sei ko’alia nafatin ho Governu haree meiu sira ne’ebé di’ak ba imi,” Horta tenik iha Palásiu Prezidensiál Dili, ohin.
Notísia relevante:Defende lia-loos, Jornalista tenke iha kualidade morál
Daudaun ne’e jornalista sira iha mundu enfrenta difikuldade oioin, ezemplu iha ASEAN no Palestina, jornalista 100- resin mak mate, kauza husi funu.
“Iha Timor sorte laiha funu, iha liberdade imprensa, maibé husi ne’e, rai ida ne’ebé livre moris iha dame laran,” nia tenik.
Nia haktuir, jornalista barak iha mundu mate la’ós Governu mak oho maibé grupu krime organizadu sira mak oho.
“Ba jornalista sira iha Timor kontinua imi nian servisu, ha’u ko’alia nafatin ho Governu atu haree meiu oinsá ne’ebé di’ak, onestu, transparente atu ajuda média nasionál hotu-hotu no inkluidu media sosiál, maibé media sosiál ne’ebé ita haree profisionál, jornál sira ne’ebé kleur ona halo sakrifísiu no ba televizaun sira no inklui televizaun privadu, ida ne’e mak Governu bele hatudu nia komitmentu ba média tau orsamentu ne’ebé di’ak ba média,” dehan PR Horta.
Horta hatutan, jornalista sira buka apriende nafatin atu sai profisionál iha kareira atu transmite informasaun ho loloos ba públiku.
Notísia relevante:Konsellu Imprensa aprezenta pontu importante ualu iha Loron Mundiál ba Liberdade Imprensa
Jornalista: Hortencio Sanchez
Editór: Florencio Miranda Ximenes
