EDTL Covalima instala ona kontadór itron rihun-resin iha postu tolu
COVALIMA, 17 Outubru 2024 (TATOLI) – Eletrisidade Timor-Leste, Empreza Públika (EDTL, E.P) Covalima instala ona kontadór ho marka itron rihun-resin ba konsumidór sira iha postu administrativu Fatumea, Fohorem no Zumalai.
“Kontadór ne’ebé ami instala ba konsumidór ne’e kategoria ligasaun foun, ne’ebé instala ona rihun-resin. Daudaun ne’e, ami submete tan proposta ba EDTL nasionál hodi husu kontadór rihun atu instala ba konsumidór sira ne’ebé uza ahi ho livre pulsa”, Xefe Unidade EDTL, E.P, Anorito Mendonça, dehan iha Bairru Costa, ohin.
Responsavel ne’e salienta Projetu Eletrifikasaun Nasionál (PEN) implementa ona iha Zumalai, maibé seidauk instala kontadór tanba empreza ladauk entrega projetu ne’e ba EDTL no bainhira entrega ona tékniku sira instala kedan.
“Ha’u la lembra dadus husi totál implementasaun PEN iha Covalima, maibé ha’u lembra de’it iha postu Zumalai ne’ebé ami prepara kontadór atu halo instalasaun, maibé sei hein kompañia entrega projetu ba EDTL tanba sira sei halo manutensaun”, dehan.
Totál kontadór ne’ebé daudaun ne’e iha armazein EDTL Covalima hamutuk rihun hodi prepara atu instala ba konsumidór sira-nia uma hafoin empreza entrega projetu.
EDTL Covalima iha funsionáriu hamutuk 35, husi númeru ne’e koloka bá iha postu sira hanesan postu administrativu Fatumea na’in-tolu, Tilomar-rua, Maucatar rua, Fatululik rua, Suai rua no Zumalai rua. Sira seluk servisu iha EDTL sentrál Covalima.
EDTL mós halo ona rekrutamentu ba tékniku na’in-15 atu destaka ba kada suku no daudaun ne’e kandidatu sira submete ona sira-nia dokumentu hodi hein rezultadu ba selesaun.
Konsumidór Verónica de Jesus rekoñese katak tékniku EDTL instala ona kontadór iha postu Fohorem, tanba durante ne’e sira la uza pulsa.
“Iha ami-nia postu Fohorem, suku sira ne’ebé durante la uza pulsa uza hotu ona, tanba tékniku sira instala ona kontadór, nune’e bainhira pulsa eletridade laiha ahi sei la lakan”, dehan.
Notísia relevante: Aldeia 11 iha Covalima seidauk asesu ba liña eletrisidade
Jornalista: Celestina Teles
Editora: Maria Auxiliadora
