Estadu Timor-Leste no Família simu ona mate-isin saudozu Koronél “Maucalo”
DILI, 17 outubru 2024 (TATOLI)- Estadu Timor-Leste no Família simu ona mate-isin maktoban Saudozu Koronél António Soares da Silva “Maucalo” ne’ebé hakotu iis iha sábadu (12 outubru 2024) iha Malázia.
Mate-isin saudozu to’o iha Aeroportu Internasionál Prezidente Nicolau Lobato, Comoro, Dili, Timor-Leste, iha tuku 14:00, ho aviaun Aero Dili, ne’ebe simu husi Estadu Timor-Leste no Família sira hodi translada ba rezidénsia matebian iha Quintál Boot Dili.
Lider nasionál ne’ebé hein iha Aeroportu mak hanesan, eis Primeiru-Ministru Taur Matan Ruak, eis Prezidente Repúblika, Francisco Guterres Lú Olo no membru Governu reprezenta husi Vise-Primeiru-Ministru, Mariano Assanami Sabino, Ministru Asuntu Veteranu, Gil da Costa Monteiro ‘Oan Soru’ no membru Governu balun.
Membru F-FDTL, Koronel Antonio Soares da Silva ‘Maucalo’ hakotu iis iha sábadu dadeer, tuku 07:00, hafoin halo tratamentu saúde iha ospitál Malázia. Saudozu hakotu nia peregrinasaun iha mundu ne’e tanba moras komplikadu kleur.
Molok ne’e, bainhira Saudozu moras família lori nia bá halo tratamentu iha Ospitál Nasionál no to’o iha ne’ebá doutór sira hateten matebian hetan ona moras grave, nune’e doutór sira rekomenda bá halo tratamentu iha rai-li’ur.nune’e, família sira lori Komandante Maucalo bá halo tratamentu iha ospitál Malázia.
Notísia Relevante: Koronel Maucalo hakotu iis hafoin halo tratamentu saúde iha Malázia
Husi tratamentu, matebian konsege rekupera no fila mai Timor iha inísiu fulan-outubru, nune’e doutór husu para matebian atu bá halo tratamentu fali ba nia moras nune’e iha tiha Malázia, moras ataka fali matebian no to’o hakotu iis, la konsege fila mai Timor-Leste.
Nune’e, iha tempu ne’ebá, família halo kedan koordenasaun ba Xefe Estadu Maiór Jenerál F-FDTL, Tenente Jenerál Domingos Raul ‘Falur Rate Laek’ atu koordena no Embaixada Timor-Leste iha Malázia atu trata dokumentu no transporta mate-isin husi Malázia mai Timor.
Biografia Saudozu Maucolo
Saudozu Antonio Soares da Silva Maucalo, Moris iha Makadiki Uatolari, Munisipiu Viqueque iha loron 09 fulan-dezembru 1962.
Molok, invasaun Maucalo tama FALINTIL nu’udar Soldadu iha sentru instrusaun Taibessi Dili. Hafoin invazaun Maucalo kontinua sai militar ho kargu soldadu partensia ba kompaiña movel ho Komando Paulino da Gama Mauk Moruk iha Setor Ponta Leste.
Iha 1976 Maucalo asumi kargu Komandante Pelutaun movel ne’ebé ikus mai transforma ba forsa intervensaun.
Iha, 1977-1978, Maucalo noemadu Komandante pelutaun primeira kompaiña de Choque . Hafoin zona libertadas rahun, hosi 1979-1980 Maucalo kontinua Komandante pelotaun forsa konsentrada.
Depois Konferensia reorganizasaun Nasionál iha 1981 Maucalo ezerse kargu Komandante pelotaun da kuatru kompaiña hosi Brigada Vermelha kolokadu iha Regiaun Nakroma.
Hosi, 1984-1991 Maucalo asumi kargu segundu Komandante ba III Unidade ba forsa konsentrada. Bataliuan 303 hosi forsa invanzasaun Indonesia kaptura Maucalo iha loron 20 fulan-junllu 1991 no sai prizoneiru iha Soibada , Ainaro 1996.
Iha prizaun Maucalo involve iha atividade organizasaun frente Klandestina to’o 1999, ikus mai reingresu ba forsa Armada FALINTIL.
Iha periode Independensia Maucalo asumi kargu nu’udar Xefe da Repartisaun da Justiça das-F-FDTL.
Iha 2017- 2022 Maucalo nomeado no asumi kargu nu’udar Xefe Casa Militar Presidensia República ho postu Coronel F-FDTL.
Jornalista: Hortencio Sanchez
Editor: Florencio Miranda Ximenes
