AINARO, 17 outubru 2024 (TATOLI)–Reprezentante Malázia iha Timor-Leste ne’ebé partisipa iha Festivál Kulturál Rabilau 2024, iha foho Rabilau, aldeia Ramori, suku Maubisse Vila, postu administrativu Maubisse, munisípiu Ainaro, konsidera presiza promove eventu hanesan Rabilau iha fatin seluk.
Embaixadór Malázia, Amarjit Singh Sarjit Singh, hateten, nia prezensa iha eventu ne’e nu’udar apoiu ida ba Governu Timor-Leste atu kontinua promove inisiativa hanesan iha fatin seluk.
“Ha’u hanoin katak ida-ne’e hanesan inisiativa di’ak tebes husi Governu no Prezidente Repúblika Timor-Leste. Fatin tradisionál hanesan ne’e tenke sai nu’udar rikusoin nasaun nian no presiza promosaun,” Embaixadór Amarjit hato’o ba Agência Tatoli, iha Festivál Kulturál Rabilau, iha munisípiu Ainaro, kinta ne’e.
Notísia relevante : Rabilau presiza infraestrutura bázika hodi promove turizmu kulturál
Diplomata ne’e kompromete katak iha futuru nia hakarak konvida turista sira husi Malázia atu partisipa iha eventu ne’e atu nune’e bele hametin relasaun entre povu no nasaun.
Festivál Rabilau nu’udar parte importante ida husi programa nasionál promosaun turizmu Timor-Leste nian no hanesan selebrasaun Timor-Leste nia patrimóniu kulturál, tradisaun no furak naturál sira.
Eventu ne’e realiza durante loron-tolu, hahú husi loron 16 to’o 18 outubru 2024, ne’ebé sai hanesan rezultadu husi kolaborasaun entre Prezidente Repúblika, Jose Ramos Horta no IX Governu Konstitusionál, ho objetivu atu hametin indústria nasionál iha área arte no kultura nian.
Jornalista : Osória Marques
Editora : Julia Chatarina
