Veteranu oan na’in-105 iha Viqueque asesu bolsa estudu
VIQUEQUE, 17 outubru 2024 (TATOLI)- Sekretáriu Ezekutivu Konsellu Kombatente Libertasaun Nasionál (CCLN, sigla Portugés) munisípiu Viqueque, Daniel Sarmento “Fugeti”, relata, lista veteranu nia oan iha munisípiu Viqueque na’in-105 asesu ba bolsa estudu.
“Selesaun ba estudante veteranu no martir sira-nia oan ba bolsa estudu nian tama ona iha faze finál. Daudaun ne’e estudante sira ne’ebé liu taka iha edfísiu CCLN munisípiu Viqueque na’in-105. Lista estudante sira-ne’e ami taka sai, karik ema ruma halo reklamasaun ami hein, orsamentu ba estudante sira-ne’e aloka iha Novembru ba estudante ida-idak nian konta bankária”, hateten Daniel Sarmento “Fugeti”, ba TATOLI, iha postu Viqueque Vila, kinta ne’e.
Vaga ba bolsa estudu ba kombatente sira nian oan iha kada munisípiu na’in-100, maibé iha munisípiu balun númeru estudante la to’o, nune’e sira pasa fali mai Viqueque atu aumenta ema na’in-lima, tanba ne’e maka rezultadu selesaun ba Viqueque sa’e ba na’in-105 mak asesu ba bolsa referidu.
Iha Abríl, CCLN simu dokumentu ba estudante ne’ebé konkorre ba vaga bolsa estudu na’in-336, maibé iha prosesu selesaun na’in-231 la pasa no na’in-105 mak pasa hodi asesu bolsa referida.
Tuir dadús estudante liu bolsa estudu ba primeiru siklu na’in-5, segundu siklu no terseiru siklu Ensinu Báziku na’in-18, Sekundáriu na’in-25, Ensinu Superiór ba rai-laran na’in-52 no Ensinu Superiór ba rai li’ur na’in-lima.
Enkuantu, Valór Orsamentu ba kada estudante primeiru siklu hetan $300 , segundu siklu no terseiru siklu ensinu báziku $600, ensinu sekundáriu hetan $650, ensinu superiór rai laran hetan $1,000 no ensinu superiór rai li’ur hetan $2,000.
“Orsamentu ne’e ba tinan ida de’it. Nune’e ba oportunidade ne’e ha’u husu veteranu no martír sira nian oan tenke estuda, lakohi estuda hakarak halimar de’it telemóvel, maka sei la hetan valór di’ak. Tanba ne’e, ha’u apela ba veteranu oan sira ne’ebé asesu ona bolsa estudu tenke fó ulun ba estuda, estuda no estuda hodi aban bain-rua servi fali nasaun no povu ida-ne’e”, nia rekomenda.
Notisia relevante: CCLN Viqueque husu veteranu nia oan sira konkorre konkursu bolsa Estudu
Jornalista : Vitorino Lopes da Costa
Editór : Floréncio Miranda Ximenes
