COVALIMA, 18 Outubru 2024 (TATOLI) – Servisu Munisipál Edukasaun (SME) Covalima rejista alunu na’in-14 husi ensinu báziku, ensinu sekundáriu jerál no tékniku vokasionál mak auzente iha ezame nasionál ba tinan letivu 2024.
Xefe Departamentu Dezenvolvimentu Parke Eskolár, Beneditos Asa, hateten Edukasaun Covalima realiza ezame nasionál bazeia ba diploma ministeriál númeru 19/2020, loron 19 Maiu, kona-ba regulamentu avaliasaun terseiru siklu ensinu báziku no diploma ministeriál númeru 22/2020, loron 19 Maiu, sobre regulamentu avaliasaun ensinu sekundáriu jerál.
“Tuir rezultadu monitorizasaun ba ezame nasionál, Edukasaun Covalima identifika alunu na’in-14 mak auzente – na’in-12 husi ensinu báziku, ida ensinu sekundáriu no ida husi eskola tékniku vokasionál”, Beneditos Asa informa iha Santa Rosa, ohin.
Rezultadu monitorizasaun konfirma katak eskola seidauk aprezenta razaun alunu falta iha ezame nasionál, nune’e Edukasaun Covalima kontinua hein bainhira atu tuir fali ezame segunda xamada nian.
“Atu tuir ezame segunda xamada, eskola presiza prienxe fali formatu, nune’e Edukasaun Covalima relata ba Gabinete Avaliasaun Dezenvolvimentu Kurríkular iha rekursu pedagójika Ministériu Edukasaun atu distribui fali pontu ezame nasionál”, dehan.
Servisu Edukasaun Covalima realiza ona ezame nasionál durante loron 14 to’o 18 Outubru. Totál sentru ezame hamutuk 33 – husi ensinu báziku terseiru siklu públiku no privadu 24, ensinu sekundáriu públiku no privadu lima no sentru ezame tékniku vokasionál haat.
Alunu finalista husi munisípiu Covalima hamutuk 2.547 mak realiza ezame – ensinu báziku 1.376, ne’ebé na’in-12 la tuir ezame, ensinu sekundáriu 949 (ida la tuir) no tékniku vokasionál 225 (ida auzente).
Diretór Eskola Sekundáriu Jerál Públika Suai, Fernando Ferreira, dehan alunu na’in-ida ne’ebé la realiza ezame ne’e seidauk hatene nia razaun loos.
Notísia relevante: Edukasaun Covalima rejista alunu 2.542 realiza ezame nasionál
Jornalista: Celestina Teles
Editora: Maria Auxiliadora
