Grupu negósiu hetan rendimentu di’ak iha Festivál Rabilau
AINARO, 18 outubru 2024 (TATOLI)–Grupu negósiu produtu kulturál, Grupu Lina Hadomi, hetan rendimentu di’ak durante fa’an produtu iha Festivál Kulturál Rabilau 2024, iha foho Rabilau, aldeia Ramori, suku Maubisse Vila, postu administrativu Maubisse, munisípiu Ainaro, ne’ebé realiza durante loron-tolu, hahú loron 16 to’o 18 outubru.
“Ami mai iha Festivál Kulturál Rabilau ne’e hahú husi tersa to’o kinta, ha’u hetan rendimentu $600. Ida-ne’e ha’u kontente tanba loron-tolu bele hetan osan ida-ne’e,” Responsável Grupu Lina Hadomi Kultura, Adelina Freitas, hateten ba Agência Tatoli, iha Festivál Kulturál Rabilau, munisípiu Ainaro, sesta ne’e.
Grupu ne’e aprezenta produtu hanesan tais halo pasta, kelu, tara save, karteira kiik, tais feto-mane nian no iha mós produtu hanesan batar sona no ukir kelu.
“Ha’u sente kontente tanba Governu la taka dalan ba ha’u husi munisípiu Dili bele mai partisipa mós iha Festival Kulturál Rabilau. Iha festa ne’e sosa la sosa ne’e laiha buat ida, importante mak Governu nafatin konsidera no fó oportunidade hodi hatudu ami-nia produtu no Governu labele haluha ami bainhira iha eventu nasionál no internasionál husu nafatin konvida ami,” nia hato’o.
Notísia relevante : Grupu negósiu 87 harame feira Festivál Rabilau aprezenta produtu lokál
Nune’e, Adelina Freitas, agradese ba Prezidénsia Repúblika no Governu nia inisiativa tanba bele hatudu ona dalan, fó fatin no mahon ba hodi grupu negósiu sira bele buka moris.
“Hakarak rekomenda ba Governu atu nafatin envolve grupu iha atividade sira hanesan ne’e. Tanba liuhusi ida-ne’e mak bele aumenta ami-nia rendimentu. Tanba kuandu fa’an iha uma ne’e depende ba ema sosa,” nia akresenta.
Grupu Lina Hadomi Kultura eziste iha tinan 2010 to’o ohin loron. Grupu ne’e hetan apoiu serbisu husi família rasik.
Iha fatin hanesan, Joven ne’ebé halo negósiu iha festivál, Geovania Freitas, hateten, nia mai ho maluk na’in-neen repzenta munisípiu Dili hodi partisipa iha eventu ne’e, ne’ebé nia fa’an kelu, pasta no produtu kulturál sira seluk.
“Ami fa’an kelu ida $1 no pasta $8 dolar, kelu ukir $1,50. Ohin ne’e hetan $100-resin, maibé durante fa’an iha merkadu Manleu di’ak mak ita hetan la to’o $50, kuandu dezembru ne’e hetan rendimentu $50 to’o $60,” nia tenik.
Geovania Freitas ne’ebé hanesan estudante aproveita loron feriadu ho atividade fa’an produtu tradisionál iha Festivál Rabilau, hamutuk ho nia pai no avo.
“Kelu ne’ebé ha’u halo ne’e apreende husi pai no to’o ohin loron ha’u bele hatene ona oinsá mak atu prodús kelu ne’e. Kelu ne’ebé mak ami fa’an ne’e uza hodi tau ba liman no balun tau ba kakorok. Iha festivál bele haree aprezentasaun turizmu no kukturál, no iha tempu hanesan bele aproveita vizita estátua Nossa Senhora Rabilau,” nia katak.
Geovania hala’o nia vida joven ho atividade negósiu nune’e bele ajuda inan-aman atu hola nesesidade bázika ne’ebé presiza.
“Ha’u nu’udar joven feto ida hakarak fó korajen ba maluk sira hotu, katak nu’udar feto labele moe hodi halo negósiu iha fatin públiku hanesan festivál sira tanba liuhusi festivál sira hanesan ne’e mak bele hetan osan no inan-aman mós bele apresia ba oan nia esforsu,” Geovania Freitas, fó hanoin.
Nia nota, Rabilau fatin furak no malarin nune’e Governu tenke kompleta ho infraestrutura bázika hanesan estrada, instala eletrisidade, dada bee-moos hodi hafurak liután fatin ne’e no bele atrai turista lokál no estranjeiru mai vizita.
“Atu furak liután mak halo uma du’ut kiik-oan iha fatin ida-ne’e hodi vizitante sira bele deskansa no karik halo orasaun iha estátua Nossa Senhora,” nia katak.
Jornalista : Osória Marques
Editora : Julia Chatarina
