AINARO, 18 outubru 2024 (TATOLI)–Grupu kulturál no negósiu aprezenta dansa kulturál produtu no ai-han tradisionál iha ámbitu Festivál Kulturál Rabilau ne’ebé realiza iha foho Rabilau, aldeia Rimori, suku Maubisse Vila, postu administrativu Maubisse, munisípiu Ainaro, iha loron 16 to’o 18 outubru.
“Ha’u partisipa no haree ona espozisaun hahán no produtu Timor iha barak. Ida ohin iha ne’e, ha’u hanoin reprezentivu liu, kualidade liu ita haree prestasaun di’ak, signifika ita bele koko halo aprezentasaun di’ak iha li’ur,” Prezidente Repúblika (PR), José Ramos Horta, hato’o iha festivál, sesta ne’e.
Nia haktuir, iha eventu Timor nian iha Singapura, la’ós kahur ho rai barak, inkluzivamente Timor nian, maibé maneira aprezenta hahán hatudu ona nível avansandu, nune’e liuhusi aprezentasaun kulinária ema haree Timor-Leste iha ona esperiénsia kulinária internasionál.
“Horiseik Embaixada Cuba, Malázia, Brunei, Indonézia, Portugal, Singapura, Uniaun Europeia, inklui reprezentante Banku Dezenvolvimentu Aziátiku (ADB, sigla inglés) sira hotu mai. Bainhira mak ita-nia kulinária Timor-Leste bele tama internasionál, Xefe Estadu dehan dahuluk mak halo promosaun ba kulinária tradisionál. Prosesu ne’e liuhusi koñesimentu no prosesu naruk liuhusi atividade internasionál,” nia akresenta.
Notísia relevante : Grupu negósiu hetan rendimentu di’ak iha Festivál Rabilau
Sekretáriu Estadu Floresta, Fernandino Vieira, hateten, agora ne’e Prezidente bele haree no sente rasik katak hahán Timor-Leste sei la lakon ho rai seluk, tanba ne’e tenke preparadu.
“Ita-nia kulinária barak no espera katak liuhusi ida-ne’e bele eleva sira-nia koñesimentu ba kualidade hahán Timor nian. Ha’u fiar katak ita bele, tanba Prezidente Repúblika iha esperiénsia barak iha rai-li’ur,” nia tenik.
Iha sorin seluk, Diretora Diresaun Nasionál Emprendedorismu Atividade Produtu Turístiku, iha Ministériu Turizmu no Ambiente (MTA), Maria Ernestina Lopes, hateten, MTA liuhusi Diresaun Nasionál Emprendedorismu, organiza ona atividade feira gastronomia nasionál sabor Timorense, ne’ebé hanesan atividade anuál ba ministériu.
“Ita agora ne’e gastronomia sai hanesan produtu lokál ne’ebé promove sai hanesan produtu turístiku ne’ebé ba oin ministériu liuhusi diresaun ida-ne’e sei dezenvolve produtu sira-ne’e sai menu ba restaurante sira,” nia informa
Tinan-haat liu ona, tantu restornate nasionál no internasionál, diresaun ne’e sempre ko’alia kona-ba rekezitu ne’ebé fó ba restorante no lisensiamentu obrigatóriamente sira tenke uza menu lokál.
“Ita-nia menu iha ita-nia restaurante ne’e presiza dezenvolve. Iha feira ne’e grupu 20 mak ita promove hodi mai partisipa feira nasionál ida-ne’e. Espera katak ita sei nafatin dezenvolve di’ak liután produtu lokál. Ita hakarak futuru produtu lokál sai menu ba restorante. Nune’e bele atrai turista internasionál ba doméstika rasik, sira tenke hatene ita-nia hahán ne’ebé orgániku tebes. Ita tenke buka meiu oinsá bele minimiza mie instan sira, liu-liu iha rai Ainaro ida-ne’e,” nia tenik.
Durante ne’e Governu foka liu bá grupu tein na’in sira hodi oinsá bele hasa’e sira-nia kreatividade hodi oferese ba bainaka internasionál. Nune’e, iha futuru ministériu ne’e bele halo serbisu maka’as nune’e bele halo lansamentu ba menu internasionál.
Jornalista : Osória Marques
Editora : Julia Chatarina
