DILI, 19 Outubru 2024 (TATOLI) – Prezidente Autoridade Munisipál Dili (AMD), Gregório Saldanha, husu, iha abertura feira Dili Day, ba populasaun sira atu diversifika no promove ai-han lokál liuhusi kulinária, tanba daudaun ne’e ema fa’an nasi goreng ho sate iha fatin-fatin.
“Ha’u hakarak fó hanoin, ita-nia kulinária sira ne’ebé tein loron-loron ita han no fó ema han tenke halo mudansa. Halo invensaun ba ita-nia produtu. Timor-Leste iha hahán tradisional hanesan ikan saboko no katupa nu’udar hahán Timór”, Gregório Saldanha sujere iha ámbitu feira ba komemorasaun Dili Day, iha Portu Dili.
Autoridade munisipál ne’e esplika katak bainhira ko’alia kona-ba negósiu presiza iha invensaun ba produtu foun no dezenvolve produtu lokál sira hodi responde ba iha nesesidade diária, tanba país iha produtu lokál hanesan lakeru, fehuk, ai-fuan, maibé la halo produsaun hodi responde ba merkadu rai-laran.
“Ita bele halo invensaun foun ida ho ita-nia naran, ema barak gosta han. Ho tempeiru no ijiene ba saúde públika, ida ne’e mak importante”, nia hateten.
Iha fatin hanesan, vendedora Nélia Cardoso Ximenes, dehan nia hetan informasaun liuhusi rede sosiál, entaun prepara hahán hodi fa’an iha feira Dili Day.
Iha feira ne’e, negosiante sira aprezenta gastronomia lokál no produtu artezanatu oioin.
Feira ne’e hodi selebra tinan 255 Dili nian ho tema “Memoriza pasadu, prepara prezente, projeta futuru”, ne’ebé monu iha loron 10 Outubru.
Notísia relevante: AMD selebra “Dili Day” ho “Memoriza passado, prepara presente projeta o futuro”
Jornalista: Jesuína Xavier
Editora: Maria Auxiliadora
