XINA, 20 outobru (TATOLI)- Profesór Cai Mingdong lori jornalista na’in-21, iha ne’ebé inklui jornalista timoroan sira, ne’ebé partisipa iha seminar media profesionál nasaun ASEAN 2024 ba vizita Xiangshan filme no televizaun inklui zona indústria ba produsaun filme iha Ningbo Xina.
Objetivu husi vizita ne’e nu’udar interkámbiu ida hodi lori jornalista na’in-21 ne’e atu hatene kona-ba ezisténsia Xiangshan filme no televizaun iha sidade inklui zona indústria ba produsaun filme iha Ningbo Xina.
Profesór Cai Mingdong, hateten, Xiangshan filme no televizaun ne’e nu’udar fatin ba loke filme.
“Ohin Ita halo vizita ida mai iha fatin Xiangshan filme no televizaun iha sidade Ningbo, fatin ida-ne’e espesiál ba haree filme sira ne’ebé mak prodús ona no iha ne’e mós Ita-boot (jornalista) sira haree kuaze instalasaun ba televizaun no fatin ne’e mak fatin ba instalasaun televizaun ne’ebé boot iha Ningbo ne’e hanaran sidade televizaun”, Professor Cai Mingdong hateten iha intervensaun bainhira lori jornalista na’in-21 ba vizita fatin Xiangshan filme no televizaun inklui zona indústria ba produsaun filme iha Ningbo Xina, domingu ohin.
Iha Xiangshan filme, iha mós zona ida espesiál ba produsaun filme ho tipu oioin.
“Fatin ida-ne’e hanesan zona ba Indústria produsaun filme iha Ningbo ne’ebé okupa área 802.000 kilometru kuadradu. Filme hotu hotu ho karakter saida de’it ninia pré-produsaun to’o produsaun produs hotu iha ne’e. Fatin Ida ne’e Fatin ne’ebé mak indústria produsaun boot iha Ázia tanba kompleta ho fasilidade mais modernu”, Nia adianta.
Profesór ne’e dehan, Xiangshan filme mós autoriza ema husi provinsia seluk iha Xina inklui mós nasaun seluk bele halo investimentu kona-ba produsaun filme. Maibé, ba dala uluk tenke koordena ho Governu lokál provinsia ida-ne’e nian molok halo investimentu ba produsaun filme iha fatin referidu.
Iha oportunidade ne’e, Profesór Cai Mingdong ho grupu voluntáriu sira lori jornalista na’in-21 ba iha zona indústria produsaun filme hodi haree direta prosesu produsaun filme hahú husi faze pré-produsaun filme to’o produsaun filme, alende ida-ne’e Profesór Cai Mingdong ho nia ekipa lori jornalista sira ba vizita fatin ema halo teatru no palásiu antigu Xina nian ne’ebé hanaran Tang Dynasty City.
Iha vizita ikus, Profesór Cai Mingdong ho ekipa lori jornalista na’in-21 ba vizita sentru komérsiu ne’ebé lokaliza iha kapitál Ningbo.
Jornalista : Natalino Costa
Editór: Rafael Ximenes de A. Belo
