DNTT Oé-Cusse hatama reseita $206.848 ba kofre
OÉ-CUSSE, 21 Outubru 2024 (TATOLI) – Husi Janeiru to’o Setembru 2024, Diresaun Nasionál Transporte Terrestre (DNTT) Rejiaun Administrativa Espesiál Oé-Cusse Ambeno (RAEOA) hatama reseita $206.848,50 ba kofre Estadu.
“Osan ne’e ita rekolla husi Janeiru to’o Setembru. Outubru seidauk sura tanba atendimentu sei la’o hela”, Xefe DNTT Oé-Cusse, Domingos de Almeida, dehan ohin.
Notísia relevante: Motorista mikrolete ezije DNTT Oé-Cusse regula movimentu angguna no tum-tum
Nia informa katak reseita ne’e arrekada barakliu husi rejistu motorizada sira-ne’ebé laiha dokumentu, inspesaun ba karreta, lisensa ba karreta angguna, mirkrolete no tum-tum.
“Ita hatene motorizada ne’ebé rejista 2000-resin. Hahú iha fulan-Maiu sira komesa trata no to’o agora hela 100-resin de’it. Semana oin bele remata ona”, nia hateten.
Motorista Januário do Nascimento Tani agradese tanba nia motór durante tinan barak laiha dokumentu no bainhira halo sirkulasaun tenke subar husi Polísia Tránzitu sira.
“Ha’u-nia [motór] hatama mai laiha dokumentu, ita halai ta’uk. Tuir dalan ita hateke de’it mak polísia sira, tanba dokumentu laiha. Maibé, agora tanba ita rejista no hetan kedas nia dokumentu, maske pagamentu karun ba motór ki’ik ne’e $96 no motór boot $120, maibé ida-ne’e mós kontribui ona ba kofre Estadu”, nia dehan.
Notísia relevante: Motorizada ilegál 1.919 iha Oé-Cusse hahú rejista atu hetan dokumentu
Jornalista: Abílio Elo Nini
Editora: Maria Auxiliadora
