OJE 2025: MTA prevee millaun $10-resin finansia programa tolu
DILI, 21 outubru 2024 (TATOLI)—Ministériu Turizmu no Ambiente (MTA) prevee $10,963,847 iha proposta Orsamentu Jerál Estadu (OJE) 2025, atu finansia programa tolu (3).
Notísia Relevante: Governu propoin OJE 2025 ho montante globál biliaun $2,6
“Orsamentu Ministériu Turizmu no Ambiente ba 2025 iha $10,963,847,” Vise Primeiru Ministru ba asuntu Ekonómiku no Ministru Turizmu no Ambiente no Ministru Koordenadór asuntu Ekonómiku, Francisco Kalbuady Lay, hato’o bainhira hala’o audiénsia públika ba proposta OJE 2025 ho komisaun D trata asuntu Ekonomia no Dezenvolvimentu ho komisaun C trata asuntu Finansa Públika iha Parlamentu Nasionál (PN).
Husi montante $10,963,847 ne’e hodi aloka ba saláriu vensimentu $4,813,195, bens no serbisu $4,417,617, transferénsia públika $ 685,000, kapitál menór $ 171,500 no kapitál dezenvolimentu $876,535.
Orsamentu ba bens no serbisu hodi hala’o ba manutensaun sítiu relijiozu sira hanesan Nosa Senhora da Graça Comoro-Dili, Santo António Fatuberlio-Manufahi, Santu António Manatuto, kontinuasaun finaliza uma Laku Ramelau, hala’o formasaun ba iha turístiku no ospitalidade, sei realiza festivaál karavana, festivál múzika no gastronómia.
Estabelese sivilizasaun sentru turístiku iha territóriu, foti dadus ba vunerabilidade no impkatu mudansa klimátika ne’e orsamentu ne’ebé aloka ba bens serbisu, hodi hala’o atividade sira no orsamentu seluk hanesan orsamentu operasionál hodi apoiu ba atividade sira.
Orsamentu ne’ebé aloka ba transferénsia públika ne’e atu apoiu ba turizmu komunitáriu, kontinua apoiu ba eventu relijiozu no eventu kulturál sira, estabelese suku pilotu turizmu lima iha munisípiu Manatuto, Aileu, Ainaro, Viqueque no Manatuto.
Orsamentu kapitál menór atu sosa ekipamentu informátika apoiu serbisu ministériu no instituisaun sira.
Orsamentu ba kapitál dezenvolvimentu aloka hodi harii sentru turístiku iha munisípiu no kontinuasaun retensaun ba projetu sira-ne’ebé hala’o ona iha orsamentu 2024 nian.
Tuir dokumentu livru proposta OJE 2025 ne’e haktuir iha Planu Asaun Nasionál, Ministériu Turizmu no Ambiente iha programa importante tolu mak hanesan, programa funsionamentu no dezenvolvimentu instituisionál ho sub-programa tolu no atividade 12.
Programa protesaun no konservasaun ambiente ho sub-programa hitu no atividade 13.
Programa turizmu ho sub-programa hitu mak hanesan, kontrolu regularizasaun no industrializasaun atividade jogu rekreativu, promosaun Timor-Leste hanesan destinu turístiku, dezenvolvimentu turizmu baze komunitáriu, dezenvolvimentu no jestaun instalasaun turístika iha Timor-Leste, dezenvolvimentu setór privadu iha área turizmu, polítika dezenvolvimentu turizmu iha Timor-Leste, infraestrutura no ekipamentu turístiku, no ninia atividade hamutuk 26.
Durante audiénsia ministériu mós hato’o ninia ezekusaun OJE 2024 ne’ebé atinje ona 77%.
Deputada PLP, Maria Angelina Sarmento, husu ministériu atu kontinua programa ambiente saudável ka programa zero plátiku liuliu redusaun plástiku no mós apoiu setór privadu sira-nia envolvimentu iha área turizmu, tanba setór privadu importante tebes.
Deputadu PD, António da Conceição “Kalohan”, fó hanoin ba prioridade sira-ne’ebé presiza atu investe duni tanba turizmu ne’e tenke dehan fonte alternativu ka fonte reseita boot ba Timor-Leste, nune’e presiza dezenvolve turizmu ne’e no promove sítiu turístiku no oinsá dezenvolve ninia infraestrutura.
Jornalista : Nelson de Sousa
Editór : Cancio Ximenes
