OJE 2025: MTK prioriza konstrusaun aeroportu internasionál Nicolau Lobato Comoro
DILI, 21 outubru 2024 (TATOLI)—Ministru Transporte nó Komunikasaun (MTK), Miguel Manetelo, hateten iha proposta Orsamentu Jerál Estadu (OJE) 2025 ministériu nian tau ona prioridade atu halo konstrusaun ba aeroportu internasionál Nicolau Lobato, Comoro, Dili.
Notísia Relevante: Governu deside kontinua desizaun anteriór ba dezenvolve Aeroportu Comoro
“Totál orsamentu ne’ebé aloka ba ministériu $13,353,528. Ita kontinua planu prioridade konklui instalasaun kabu submarinu, hahú konstrusaun aeroportu internasionál Nicolau Lobato, halo estudu viabilidade ba portu Ataúro no bele mós Com. Tanba, Ministériu Agrikultura liuhusi kooperasaun ho KOICA halo ona estudu viabilidade ba portu Com para konstrusaun portu ba peska no ami ko’alia ona oinsá mak hamutuk halo portu integradu,” Ministru Miguel Manetelo hateten ba jornalista sira hafoin halo audiénsia públika ba proposta OJE 2025 ministériu nian ho komisaun E trata asuntu Infraestrutura iha Parlamentu Nasionál (PN), segunda ne’e.
Aliénde ne’e, ministériu iha programa sira seluk tan ne’ebé prevee ona iha orsamentu tinan oin atu implementa.
Tuir dokumentu livru OJE 2025 Planu Asaun Anuál, serbisu no entidade setór públiku administrativu haktuir katak MTK prevee $13,353,528 hodi aloka ba saláriu vensimentu $4,659,105, bens no serbisu $6,336, 053, transferénsia públika $1,811,500, kapital menór rihun $250, kapitál dezenvolvimentu $296,870.
Hosi orsamentu ne’e, finansia programa transporte ho sub-programa haat (4) no atividade 16.
Programa funsionamentu no dezenvolvimentu instituisionál ho sub programa tolu (3) no atividade 13.
Programa serbisu postál ho sub-programa ida (1) no atividade tolu (3).
Programa inkluzaun sosiál ho sub-programa ida (1) no atividade neen (6).
Programa teknolójia no informasaun no Komunikasaun ho sub-programa ida (1) no atividade tolu (3).
Programa meteorolojia no jeofísika ho sub-programa ida (1) no atividade tolu (3).
Tuir dokumentu livru proposta OJE 2025 ba Fundu Infraestrutura haktuir katak iha proposta OJE 2025 fundu infraestrutura iha programa aeroportu katak aeroportu no viajen aérea internasionál ba Timor-Leste importante tebes ba dezenvolvimentu ba negósiu no turizmu, maibé nasaun carece aeroportu adekuadu ba padraun internasionál aseita husi organizasaun aviasaun sívil internasionál (ICAO, siglá portugés).
Serbisu aviasaun doméstika limitadu aeronaves fretadas de asa fixa no serbisu elikópteru no aerodromu serbisu inadekuadu hodi simu aeronaves maiores no serbisu intensivu.
Governu iha vizaun mellora no dezenvolve aeroportu sira ezistente iha Dili, Suai, Baucau, Maliana no Viqueque.
“Atualmente projetu 12 listadu iha kategória aeroportu inklui projetu ualu (8) ein-curso, projetu tolu foun/la insiadu no projetu seluk iha ida. Orsamentu ba programa aeroportu ba 2025 iha $29.645.268,” haktuir livru dokumentu proposta OJE 2025 ba fundu infraestrutura ne’ebé Agência Tatoli sita.
Jornalista : Nelson de Sousa
Editór : Cancio Ximenes
