COVALIMA, 21 Outubru 2024 (TATOLI) – Servisu Munisipál Edukasaun Covalima finaliza ona projetu komunitáriu 2023 nian, ne’ebé implementa iha tinan ne’e hodi halo konstrusaun no reabilitasaun ba eskola sia.
“Ita finaliza ona pagamentu ba projetu komunitáriu, tanba progresu serbisu iha terrenu nia atinje ona 100%. Bainhira mak entrega ita hein de’it tékniku Ajénsia Dezenvolvimentu Nasionál”, Diretora Servisu Munisipál Edukasaun Covalima, Elda de Fátima, informa ohin.
Implementasaun Projetu Konstrusaun no Rabilitasaun Infraestrutura Edukativa (PKRIE) sia husi grupu komunitáriu ka komunidade sira ho nia verba mai husi Orsamentu Jerál Estadu 2023 ho montante $857.818,80.
Projetu sia ne’e mak reabilitasaun no konstrusaun ba Eskola Bázika Filiál (EBF) 1,2 Tilomar ho osan $82.859,98, Pré-eskolár Belulik Kraik $99.147,20, Pré-eskolár Ogues $96.524,37, Suai-Loro $95.518,89, Tali-Oan $108.804,9, EBF Tobur $84.298 13, Eskola Bázika Sentrál Fohorem $85.228,33, Pré-Eskolár Camnasa $109.338,63, no Zulo Taz $96.098,36.
Elda de Fátima salienta katak atu kontinua projetu komunitáriu ne’e depende ba desizaun husi Ministériu Edukasaun (ME), tanba eskola barak presiza atu hadi’a no tuir informasaun, iha 2025 sei kontrui de’it Eskola Bázika Filiál Halik.
“Tinan oin konstrui de’it eskola ida, tanba Programa Nasionál Dezenvolvimentu Suku mós hadi’a ona eskola barak. Ha’u la fiksa totál eskola hira mak PNDS hadi’a”, nia realsa.
Enjeñeiru Natalino Moniz relata katak progresu konstrusaun Pré-eskolár Suai Loro atinje ona porsentu 95 no falta kompleta dada liña eletrisidade no monta kuadru.
“Ita haree kontrusaun pré-eskolár ne’e pinta no monta azuleiju sira hotu ona, nune’e bainhira ami komplete instalasaun liña eletrisidade, posibilidade iha Outubru nia laran bele entrega ona”, dehan.
Implementasaun PKRIE ne’e ho durasaun fulan-neen, maibé foin lalais estende tan fulan neen nune’e bele garante kualidade projetu referidu.
Notísia relevante: Edukasaun Covalima relata progresu konstrusaun infraestrutura edukativa 10
Jornalista: Celestina Teles
Editora: Maria Auxiliadora
