DILI, 21 outubru 2024 (TATOLI) – Estabelesimentu ensinu superiór privadu UNDIL planea oferese formasaun língua portugeza ba dosente sira iha fulan-novembru ne’e liuhusi halo kooperasaun ho Ministériu Ensinu Superiór Siénsia no Kultura (MESSK).
“Tanba osan subvensaun públiku ne’e mós tau hotu ba iha formasaun língua portugés, nune’e UNDIL planu hela atu koopera ho Ministériu Ensinu Superiór hodi bele haruka formadór sira husi Portugál ou Brazil liu-liu husi Instituisaun Camões nia hodi mai fo formasaun ba ita-nia dosente sira iha área língua nia, nune’e ita-nia dosente sira bele aprende liután língua hodi hanorin ita-nia estudante sira”, Vise-Reitór Administrasaun Rekursu Umanu Matéria no Finanseiru, Tomas Agustu Correia, hatete, jornalista sira, iha kampus UNDIL, Kintal-boot, segunda ne’e.
Alende ne’e mós, Universidade Dili (UNDIL) planea atu fó formasaun língua portugés ba estudante sira.
“La’ós ba dosente sira de’it mak presiza aprende língua maibé estudante mós presiza atu aprende, nune’e bainhira dosente ba hanorin sira karik hodi kompleta de’it ona”, nia dehan.
Diretora Jerál MESSK, Maria Filomena Lay, hatete, formasaun língua portugés ba timoroan sira-nia, ho kompeténsia atu sertifika profisiénsia linguístika iha portugés.
“Kursu formasaun ida-ne’e kona-ba sertifikasaun profisiénsia lian nian iha lian Portugés, ita selebra la’ós de’it aprendizajen ne’ebé hetan, maibé mós kompromisu no dedikasaun husi ema ida-idak. Profunda liután iha lian maka viajen ida ne’ebé riku no transformativu, no agora, armadu ho koñesimentu no abilidade foun sira, ita-boot sira prontu atu hasoru dezafiu no oportunidade foun sira ne’ebé iha”, nia dehan.
Notísia relevante:UNDIL fó formasaun ba dosente hodi eleva kualidade edukasaun
Jornalista : Osória Marques
Editór: Rafael Ximenes de A. Belo
