Xanana-Prabowo diskute asuntu fronteira terrestre
JAKARTA, 21 outubru 2024 (TATOLI) – Primeiru Ministru (PM), Kay Rala Xanana Gusmão, segunda ne’e hasoru malu Prabowo Subianto hafoin simu pose nu’udar Prezidente Repúblika Indonézia, hodi diskute prioridade atu finaliza fronteira terrestre entre nasaun rua.
Xefe Governu, Xanana Gusmão hamutuk ho delegasaun komposta husi Ministru Negósiu Estranjeiru no Kooperasaun (MNEK), Bendito Freitas, Sekretáriu Estadu Komunikasaun Sosiál (SEKomS), Expedito Dias Ximenes no Embaixadór Timor-Leste iha Jakarta, Roberto Soares to’o iha Palásiu Prezidente Repúblika Indonézia, Jakarta, iha oras 17:15 lokraik.
Notísia relevante: Prabowo motiva povu Indonézia atu hasoru dezafiu no ameasa husi rai-li’ur
Enkontru entre líder na’in-rua nu’udar sorumutu ba dahuluk no ofisiál hafoin Prezidente Repúblika Indonézia, Prabowo Subianto simu pose nu’udar xefe estadu no governu iha loron-dumingu, 20 outubru iha Parlamentu Nasionál (MPR, sigla Portugés) Jakarta.
Sorumutu no durasun menuto 30-resin ne’e, Primeiru Ministru, Xanana Gusmão manifesta felistasaun ba susesu eleisaun no hato’o parabéns ba kna’ar foun Prabowo Subianto nu’udar xefe estadu.
Xanana Gusmão hato’o planu prioridade bilaterál entre Timor-Leste ho Indonézia ligadu ho fronteira terrestre ne’ebé iha siklustánsia balun presiza atu hadi’a no tetu hamutuk entre Indonézia ho Timor-Leste.
“Ida-ne’e prioridade tebes, ita remata ona ho Austrália entaun ho Indonézia tenke finaliza tanba ita bele sai soberania ne’ebé loloos,” Ministru Negósiu Estranjeiru no Kooperasaun hateten iha Jakarta, segunda ne’e.
Xanana husu ba Ministru Negosiu Estranjeiru Indonézia, Sugiono atubele halo kontaktu no koordena ho Embaixaidór Timor-Leste iha Jakarta, Roberto Soares tanba envolve iha diskusaun fronteira entre nasaun rua.
Nune’e, Prezidente Prabowo iha enkontru fo-sai orden ba Ministru Negósiu Estranjeiru Indonézia, Sugiono atu haree hikas (estuda) akordu sira antes tékniku sira transmite progresu kona-ba fronteira.
“Ita espera katak ba oin bele iha diskusaun atu hetan susesu ida di’ak ba rai-rua,” Bendito Freitas akresenta.
Timor-Leste konsidera negosiasaun fronteira terrestre ho Indonézia importante atu iha solusaun nune’e ho relasaun emosional entre Xanana ho Prezidente Prabowo bele iha konkordánsia, maske seidauk iha ajenda espesífiku hodi kontinua diskusaun.
“Primeiru Ministru hato’o atu iha koordenasaun ne’ebé aselerada hodi bele haree situasaun ne’e bele rezolve,” Bendito Freitas hateten.
Timor-Leste ho Indonézia asina ona nota aseitasaun ba finalizasaun fronteira terrestre ne’ebé konsege konklui ona segimentu rua hanesan Noelbesi-Cidrana no Bijael Sunan-Oben.
Área Noelbesi-Cidrana fronteira entre Kupang, Nusa Tenggara Timur, Indonézia ho Oecuse, Ambeno,Timor-Leste.
Enkuantu, Bijael Sunan-Oben iha área Timur Tengah Utara, Indonézia ho Oecuse, Ambeno husi parte Timor-Leste ho medida ektare 142,7.
Notísia relevante: Abitante Naktuka fó fiar bá Xanana luta to’o finaliza fronteira terrestre
Jornalista : Natalino Belo
Editór : Evaristo Soares Martins
