DILI, 21 outubru 2024 (TATOLI)– Universidade de Dili (UNDIL) planu fó graduasaun ba finalista hamutuk 500 iha fulan-dezembru tinan ne’e.
Vise-reitór Administrasaun Rekursu Umanu Matéria no Finanseiru, Tomas Agusto Correia, hatete, dadus lista estudante finalista submete ba Ministériu Ensinu Superiór Siénsia no Kultura (MESSK), nune’e iha fulan novembru hodi halo verifikasaun.
“Graduasaun tinan ida-ne’e iha dezembru, agora sei rejistu hela, fulan ida-ne’e ramata rejistrasaun taka ona para dokumentu sira-ne’e ita bele submete ba iha Ministériu Ensinu Superiór Siénsia no Kultura hodi halo verifikasaun. Daudaun sira rejistu ne’e hamutuk 400-resin, ne’ebé ami sei prolonga to’o iha fulan-outubru ida-ne’e, para to’o tiha 500. Tanba kada tinan ne’e ami fó graduasaun ba estudante sira-ne’e 500 no 600 maibé tinan ida-ne’e planu atu fó graduasaun ba 500,” nia dehan kampus UNDIL, Kintal-boot, segunda ne’e.
Vise-reitór ne’e dehan, tuir loloos rejistrasaun ba graduasaun nia ne’e taka ona iha 19, maibé iha estudante barak mak ezame monografia hotu ona maibé seidauk rejistu entaun universidade prolonga tan rejistrasaun ne’e to’o fulan Outubru remata.
“Tanba ne’e husu ba estudante sira ne’ebé mak ezame monografia hotu ona maibé seidauk rezistu karik bele hakbesik an mai rejistu no kompleta tiha dokumentu sira-ne’e nune’e fulan Novembru dadus ita hatama ba iha Ministériu ensinu superiór “, nia dehan.
Akadémiku ne’e hatutan, baibain UNDIL fó graduasaun ba estudante sira tinan ida dala rua maibé ba tinan ida-ne’e dala ida de’it tanba estudante finalista menus.
“Tuir loloos ne’e atu halo graduasaun ba dalarua iha tinan ida-ne’e, maibé tanba estudante sira ne’ebé atu gradua ne’e uituan de’it entaun ita tau hamutuk hodi muda ba iha dezembru”, nia informa.
Entretantu, UNDIL iha Fakuldade neen hanesan Fakuldade Ekonómia, Direitu, Siénsia Polítika, Siénsia Saúde, Edukasaun no Fakuldade Tekniku, ho nia departamentu 12. Enkuantu totál estudante ne’ebé dadaun ne’e ativu hamutuk 4.500 ho dosente 215.
Notísia relevante:Reitór UNDIL husu finalista 161 hamorin universidade nia naran iha sosiedade
Jornalista: Osória Marques
Editór: Rafael Ximenes de A. Belo
