DILI, 22 outubru 2024 (TATOLI) – Sekretariu Estadu Asuntu Veteranu César da Silva ‘Merak’ hateten, hahú fulan-janeiru Governu fó sai ona rezultadu ikus ba veteranu rejistadu 2009 hodi halo pagamentu.
“Prosesu ba veteranu rejistadu 2009 ita finaliza ona, janeiru tinan oin ita taka sai ona editál, bainhira naran sira fó sai ona hahú ona halo pagamentu, maibé pagamentu sura de’it husi janeiru tanba lei veteranu nian la temi retroativu,” César hateten ba veteranu sira iha Liquiça, segunda ne’e.
Tanba ne’e, nia husu ba veteranu sira labele laran susar kontinua hein ho esperansa tanba esforsu hotu Governu halo ona atu alkansa ba faze finalidade.
“Maluk sira (veteranu) prosesu ne’e naruk tebes, ne’ebé ita hein ho pasiénsia lai, tinan oin veteranu rejistadu 2009 simu ona imi-nia pensaun,” nia garante.
Iha parte seluk, kona-ba pendente hanesan 0-3 no 4-7 no Governu deside halakon ona hodi hamosu fali 3-7 hodi valoriza ema hirak ne’ebé sofre iha momentu baze apoiu tinan tolu.
“Kona-ba sira ne’ebé pendente hanesan 0-3 no 4-7 Governu halakon ona, ida-ne’e la signifika halakon sira-nia direitu, maibé Governu muda fali ba 3-7 hodi valoriza sira ne’ebé sofre iha baze apoiu tinan tolu antes baze apoiu rahun ne’e. Tuir ita haree funu ne’e nia todan mak tinan tolu baze apoiu ne’e, ida-ne’e ita tenke haree hotu sira ne’e,” Merak tenik.
Nia dehan, durante tinan tolu; hahú 1975-1978, inan aman barak mak terus husi militar Indonézia ne’ebé halo bonbardeamentu iha fatin-fatin.
“Entaun ba inan-aman sira ne’ebé tama iha kategoria 3-7 ami sei haree hodi prosesu iha tinan-2026 hodi rezolve, maibé nia prosesu hotu ami ka’er nafatin ba giaun 2009 nian,” nia hakotu.
Entretantu, liuhusi konteudu ne’ebé mensiona iha Estatutu Kombatente Libertasaun Nasionál Lei númeru3/2006 no artigu 13 hateten Registo da Qualidade de Combatente da Libertação Nacional sei kontinua halo validasaun, rejistu ba périodu da-ruak nian ba rekoñesimentu hanesan Kombatente ne’ebé rejistu iha 2009.
Notísia relevante:Governu reforsa kompeténsia CCLN ba Fundu Investimentu Veteranu
Jornalista: Hortencio Sanchez
Editór: Rafael Ximenes de A. Belo
