NINGBO, 18 outobru 2024 (TATOLI)- Jornalista na’in-21 hala’o vizita ba fatin komunidade Yulan iha provinsia Ningbo, Xina no koñese pintura kaligrafia Xinés sira nian.
Atividade vizita ba Fatin Komunidade Yulan (Yulan Community), ne’e nu’udar parte ida husi ajenda loron datoluk husi semináriu Media profisionál ba nasaun Sudeste Aziatiku ka seminar for media professional in ASEAN coutries, iha provinsia Ningbo, Xina.
Jornalista ASEAN ne’ebe halo vizita ba komunidade Yulan ne’e kompostu Laos na’in -10, Myanmar na’in lima, Timor-Leste na’in haat, Malázia na’in ida, inklui jornalista husi Repúblika Ceko na’in ida.
Iha atividade vizita ne’e akompaña direta husi grupu voluntáriu ba eventu semináriu media profisionál ba nasaun ASEAN hala’o iha Provinsia Ningbo.
Objetivu ba vizita ba Yulan Community ne’e atu lori besik jornalista na’in-21 ba koñese pintura kaligrafia Xina nian.
Xefe ba Komunidade Yulan, Profesora Cao Bo hateten, Yulan Community, nu’udar fatin ba aprende ba estudante sira oinsá atu hatene kaligrafia Xina no bele hatene pinta kaligrafia Xina.
“Dala barak ema la komprende letra Xina no saida mak ami hakerek. Tanba ne’e fatin ida ne’e nu’udar fatin ba pintura kaligrafia Xina nian oinsá ita atu hatene letra Xina nian ka kaligrafia Xina nian,” Cao Bo hateten iha intervensaun iha Yulan Community Ningbo, sesta ne’e.
Profesora Cao Bo dehan, Yulan Community ne’e simu estudante nasaun hotu kuandu mai vizita iha Ningbo.
“Fatin ne’e estudante husi nasaun barak mak Mai vizita ona. Ami loke ba estudante husi nasaun hothotu. Kuandu sira mai Ningbo sira hakarak liu mai vizita iha ami-nia fatin, ami autoriza sira bele haree pintura kaligrafia sira iha ne’e no sira mós bele pratika pinta kaligrafia Xina nian,” nia adianta.
Nia agradese ba estudante na’in-21 ne’ebe bele hiit aan mai vizita ona iha Yulan Community.
“Obrigadu no agradese tebes, tanba ita-bo’ot sira (jornalista) bele mai vizita iha ami-nia fatin ida-ne’e. Depoizde ita-bo’ot sira vizita ita-bo’ot sira idak-idak bele prátika hodi pinta letra kaligrafia Xina nian,” nia afirma.
Iha fatin hanesan, Jornalista Laos, Phouvyrath Phengsavath, hateten, vizita ida-ne’e interresante tanba bele lori ita bele hatene di’ak liután kultura Xina nian.
“Ha’u sente kontente ba iha semináriu ida-ne’e ohin ita tama ona ba loron tolu no durante loron tolu ne’e ita aprende ona buat barak hanesan kultura karaterístika Xina nian, inklui polítika, ekonomia no vida sosiál Xina ninia no ita bele partilla esperiénsia ba malu. Ohin ita mai vizita fatin ida-ne’e tan ha’u hanoin ida-nee interresante,” nia konklui.
Notísia relevante:Jornalista 21 vizita zona indústria produsaun filme iha Ningbo
Jornalista : Natalino Costa
Editór: Rafael Ximenes de A. Belo
