OÉ-CUSSE, 22 Outubru 2024 (TATOLI) – Sekretária Estadu Formasaun Profisionál no Empregu (SEFOPE) halo abertura ba formasaun lia-inglés ba kandidatu traballadór Austrália hamutuk na’in-329 iha Rejiaun Administrativa Espesiál Oé-Cusse Ambeno (RAEOA).
Iha sesaun abertura, Xefe Gabinete SEFOPE, Jacinto Ribeiro Dias, husu ba formandu sira atu partisipa formasaun ho pasiénsia, tanba atividade ne’e realiza bazeia ba teste online ne’ebé realiza ona iha territóriu no ema ne’ebé iha valór ki’ik husi 0-49 labele prienxe rekizitu iha sistema.
Notísia relevante: SEFOPE sei desentraliza formasaun lian ingles no korea iha Oé-Cusse
Nune’e, SEFOPE kria mekanizmu hodi halo jestaun hakbesik formasaun ba iha munisípiu hodi fó oportunidade ba joven sira-ne’ebé rejistu iha sistema kontinua tuir formasaun atu hasa’e sira-nia nivel inglés ba iha valór 50 ba leten, nune’e iha futuru bele atualiza fali ba iha sistema hodi kompete iha oportunidade tuirmai.
“Importante mak pasiénsia atu partisipa iha programa ne’ebé SEFOPE kria. Tuir formasaun la’ós bá Austrália, maibé atu hetan oportunidade iha área ne’ebé iha, tanba língua mak ponte atu komunika ho sé de’it”, Jacinto Dias dehan iha abertura formasaun ne’e.
Nia esplika prosesu formasaun ne’e SEFOPE mak prepara formadór husi nasionál hodi disponibiliza formasaun durante fulan tolu, hahú Outubru to’o Dezembru 2024, tanba hetan sertifikadu ida tenke kumpre oras formasaun 48.
“Bainhira remata, sertifikadu ne’e sira lori bá update fali sira-nia naran iha sistema, la bá ona nasionál, maibé koordena de’it iha munisípiu idak-idak”, informa.
Daudaun ne’e, SEFOPE foku ba sira-ne’ebé tuan, tanba rejista ona sistema ho dadus provizóriu iha rihun 40-resin. Husi dadus ne’e, purvolta 60% mak valór la sufisiente, nune’e SEFOPE esforsu buka tuir atu haforsa sira-nia koñesimentu iha dalen inglés.
Notísia relevante: SEFOPE halo abertura teste eskrita ba kandidatu traballadór Austrália 992
Iha fatin hanesan, Diretór SEFOPE Oé-Cusse, Mário Muni Salu, esplika katak formasaun ne’e ho fazeadamente tanba falta formadór no fatin ba realiza formasaun. Daudaun ne’e, SEFOPE prepara formadór na’in-haat hodi fó formasaun ba kandidatu na’in-329 iha Eskola Bázika Filiál 28 Agostu.
“Etapa daruak ba sira-ne’ebé rejista ikus. Dadus ho valór ki’ik ne’ebé rejista iha Oé-Cusse hamutuk 800-resin, maibé depois reanunsia iha de’it 400-resin no balun iha Dili no balun iha fatin seluk, entaun na’in-329 mak daudaun atu partisipa formasaun”, dehan.
Notísia relevante: SEFOPE prevee millaun $8.4 finansia programa haat iha OJE 2025
Rekorde katak SEFOPE Oé-Cusse rejista, antes ne’e, kandidatu traballadór na’in-992 no konsege partisipa iha teste liuhusi programa Pacific Australia Labour Mobility (PALM), maibé na’in 800-resin la liu.
Jornalista: Abílio Elo Nini
Editora: Maria Auxiliadora
