OÉ-CUSSE, 23 fevereiru 2024 (TATOLI) – Sekretáriu Estadu Formasaun Profisionál no Empregu (SEFOPE), Rogério Araujo Mendonça, sesta ne’e hala’o enkontru kortezia ho Koordenadór Ezekutivu, ZEESM, João Mendes Gonçalves, hodi koordena atu loke formasaun lian ingles ho lian korea iha Rejiaun Administrativa Espesiál Oé-Cusse Ambeno (RAEOA).
“Sorumutu ne’e importante, tanba SEFOPE mai koordena ho Koordenadór ZEESM no Prezidente Autoridade RAEOA, nia pontu atu servisu hamutuk kona-bá área formasaun,” Rogério Araujo Mendonça, ba jornalista sira hafoin remata enkontru iha Oé-Cusse.
Notísia relevante:Koreia Súl loke tan oportunidade serbisu ba timor-oan iha área agrikultura
Governante ne’e, informa, durante ne’e SEFOPE sentraliza formasaun sira iha nasionál, tan ne’e presiza loke tan iha munisipíu atu fasilita formasaun rekursu umanu no loke mós iha Oé-Cusse.
“Formasaun ne’e, ba lian rua de’it, língua ingles no korea, ne’e pilotu primeiru, ita hahú iha Oé-Cusse mak ida-ne’e,” nia katak.
Koordenadór Ezekutivu ZEESM, João Mendes Gonçalves, konsidera koordenasaun ne’e importante, maibé presiza kooperasaun liuhosi Memorandum Entendimentu (MoU), bele haforsa liután kooperasaun ne’e.
“SEFOPE prontu atu fó apoia totál atu koopera ho RAEOA, purtantu iha prosesu formasaun no atividade seluk ba preparasaun rekursu umanu ba iha futuru, ita presiza prepara Oé-Cusse oan.”
Nia hateten, maske Governu Sentrál entrega ona podér ba RAEOA, maibé atu hametin liután kooperasaun ne’e, presiza selebra MoU ida entre RAEOA ho SEFOPE, nune’e bele kontinua apoia ba servisu no atividade sira iha Oé-Cusse.
Notísia relevante: SEFOPE finaliza ona vaga serbisu bá Austrália ho aplikante hamutuk 50.578
Jornalista: Abílio Elo Nini
Editór: Evaristo Soares Martins
