COVALIMA, 22 Outubru 2024 (TATOLI) – Servisu Saúde Munisípiu (SSM) Covalima halo kobertura vasina vírus papiloma umanu (HPV, sigla inglés) ba labarik feto sira, entre idade 11 no 14 hamutuk 3.968.
Diretór SSM Covalima, Domingos Sequeira, informa katak alvu vasina ba alunu feto sira hamutuk 3.708 no labarik la eskola hamutuk 162, maibé númeru sa’e liu tiha ba 3.968.
“Iha implementasaun númeru liu tiha alvu. Importante mak alunu simu hotu ona vasina hodi prevene kankru serviks”, Domingos Sequiera dehan.
Diretór ne’e salienta katak númeru alunu atu simu vasina sa’e, tanba molok Saúde Covalima implementa programa halo ona advokasia nivel munisipál no to’o postu sira hodi halo esplikasaun kona-ba benefísiu husi vasina referida.
“Atu hahú vasina ami halo uluk koordenasaun ho profesór sira iha eskola hodi prepara alunu, nune’e ladún difísil ba pesoál saúde sira tama sai eskola hodi vasina HPV ba alunu sira durante ne’e”, dehan.
Lembra katak Servisu Saúde Covalima lansa vasina HPV iha Eskola Bázika Sentrál Ogues, iha postu Maucatar, iha loron 26 Setembru no konklui ona 18 Outubru ne’e.
Superintendente Servisu Edukasaun Covalima, Jacinto do Carmo, reforsa katak alunu sira presiza simu imunizasaun hodi hasa’e imunidade ba prevensaun kankru kolu úteru.
Notísia relevante: Labarik feto hamutuk rihun 56-resin simu vasina HPV
Jornalista: Celestina Teles
Editora: Maria Auxiliadora
